Oras 72 Ba CNE Verifika Votu Nulu, Reklamadu no Branku Molok Submete Ba TR

Hatutan.com, (22 Marsu 2022), Dili- Sekretariadu Tékniku ba Administrasaun Eleitorál (STAE) nia servisu kontajen votu finál ona iha Segunda kalan (20/03/2022), tuku 21:10 Otl. Tuir mai, iha oras 72 nia-laran ka loron-tolu nia-laran, hahú husi Tersa-Kinta (22-24/03/2022), Comissăo Nacional de Eleições (CNE) sei verifika hikas votu nulu, reklamadu no baranku, molok submete ba iha Tribunál Rekursu (TR).

Notísia iha Relasaun: Kontajen Finál, Ramos-Horta Kontinua Lidera ho Votu 301,481

Urna sensetivu Eleisaun ba Prezindente Repúblika 2022-2027. Foto/Hatutan.com

Hafoin kontajen durante loron tolu, husi  Sábadu-Segunda (19-21/03/2022), tuku 21:10 Otl, STAE konsege finaliza akta sira hosi munisípiu 12, inklui Rejiaun Administrativu Espesiál Oé-Cosse Ambeno (RAEOA), hatudu katak, rezultadu provizóriu kandidatu Prezidente Repúblika husi partidu CNRT, José Manuel Ramos-Horta, kontinua lidera ho totál votu 301,481 (46.58%).

Maske nune’e, rezultadu hosi votu válidu ida-ne’e, Laureadu Nobel da Pás José Ramos-Horta seidauk atinje persentajen 50%+1  no CNE  sei halo apuramentu ikus, no verifikasaun fila-fali ba votu reklamadu, nulu, branku sira, ne’ebé mak tuir lei sei hala’o durante loron tolu  ka oras 72 nia laran.

Diretór Jerál STAE, Acilino Manuel Branco, klarifika katak  durante loron tolu, hahú hosi  loron 19 to’o  loron 21 fulan-Marsu ne’e, tékniku sira halo apuramentu no rezultadu provizóriu hanesan saida mak públiku akompaña. Rezultadu sira ne’e, parte STAE hala’o tuir ninia faze sira.

“Atu hato’o katak, prosesu sira tomak ne’e, ita la’o tuir ninia faze. Ita la dehan katak, faze ida ne’ebé mak STAE responsabiliza ba tomak, mak to’o ona ba ohin ninia rohan. Maibé, ita labele haluha katak, sei iha faze tuir mai, ne’ebé maka sei iha oras 72 nia laran iha CNE, para depois sei haree fila-fali reklamasaun sira, votu nulu  no mós votu válidu ne’ebé maka tuir rezultadu provizóriu kuaze 2%, para depois hodi kontinua ninia prosesu ba iha Tribunál de Rekursu, tuir kalendáriu eleitorál ne’ebé mak iha,” Acilino Manuel Branco, informa, Segunda kalan ne’e.

Nia hateten, Tribunál Rekursu ka  Supremu Tribunál Rekursu  maka  iha kompeténsia lori pronunsia ka proklama ninia rezultadu finál.

Acilino dehan, iha prosesu sira tuir mai, STAE sei kontinua ezerse ninia funsaun hanesan baibain, hanesan servidór Estadu ida, prosesu ida hotu ona, maibé sira kontinua hala’o  funsaun hodi lori akompaña ninia prosesu tuir mai.

Diretór Jerál STAE, Acilino Manuel Branco. Foto/Hatutan.com

“Tuir kalendáriu eleitorál ne’ebé mak iha, ita boot sira rasik asesu, sé la sala entre dia 30 to’o 31 Marsu ka  loron 01 fulan-Abríl hanesan ne’e, rezultadu finál sai ona, hotu-hotu bele asesu ona, depois ita hodi haree ninia prosesu ba oin atu la’o halo nusa. Mais to’o agora, ha’u labele adianta uluk buat ruma, kona-bá kontinuasaun hosi prosesu ida-ne’e ba oin halo nusa,  Acilino Manuel Branco esplika.

Hosi númeru eleitór ne’ebé rejistadu hosi STAE, iha eleitór hamutuk 195.507 (22,74%), mak la partisipa iha votasaun hodi fó sira nia votu.

Hosi totál akta sira ne’ebé nia prosesu kontajen remata, kandidatu husi CNRT, José Manuel Ramos-Horta, hetan votu 301,481 (46.58%),  kandidatu husi partidu FRETILIN, Francisco Guterres “Lú Olo” hetan votu 143.408 (22,16%), Armanda Berta dos Santos 56,289 (8,70 %), Lere Anan Timur 48,959 (7,57%), Mariano Assanami Sabino 47,008 (7,26%), Anacleto Ferreira 13,059 (%2,02), Martinho Gusmão 8.485 (1,31%), Hermes da Rosa Correia Barros 7,958 (1,23%), Milena Pires 5,335 (0,82%), Isabel Ferreira 4,165 (0,64%), Felisberto Araujo Duarte 2,615 (0,40%), Constâncio Pinto 2,474 (0,38%), Rogério Lobato 2,028 (0,31%), Virgílio Guterres 1,685 (0,26%), Antero Bendito 1,531 (0,24%) no Ângela Freitas 692 (0,11%).

Jornalista: Vito Salvadór/Rogério Cárceres