Papa Francisco: Ema Hotu Iha Obrigasaun Morál Reza Ba Pás iha Ukránia-Rússia

Hatutan.com, (24 Marsu 2022), Díli-Papa Francisco  husu ema fiar-na’in hotu atu reza ba pás no estabilidade iha mundu tomak, liuliu ba nasaun sira ne’ebé enfrenta hela krize polítika no konflitu hanesan Ukránia no Rússia.

Notísia iha Relasaun: EUA Nia Deklarasaun Ba Situasaun iha Ukránia

Populasaun Ukránia asiste serimónia funerál ba forsa Ukránia ne’ebé mate iha funu Ukránia ho Rússia. Foto/AP

Arsebispu Metropolitana Díli, Dom Virgílio do Carmo da Silva, SDB, ba jornalista sira iha kampus sentral UCT, Balide, Kinta (24/03/2022), haktuir, bazeia ba konvite husi Amu Papa ne’ebé husu ema fiar-na’in sira atu reza ba Ukránia no Rússia maka Igreja katólika iha Timor Leste hasai mós konvite ba lideransa nasaun no konfisoin relijiozu hotu atu halibur hamutuk iha katedral Díli iha Sesta (25/03/2022), tuku 09:00 dadeer hodi hamutuk halo orasaun.

“Ita hotu sei hamutuk iha oras ne’ebé hanesan, hasae ita-nia lian liu husi orasaun hodi harohan ba pás,” Dom. Virgílio do Carmo da Silva hateten.

Konteúdu husi orasaun ne’ebé Amu Papa husu atu ema hotu halo iha loron aban maka husu Nai Maromak bele hamamar ukun-na’in husi nasaun Ukránia no Rússia atu fuan nakloke ba diálogu, pás no liuliu hanoin ba povu rai rua nia terus.

“Iha orasaun ne’e ita husu atu lideransa sira nasaun rua ne’e tau tiha ba kotuk sira-nia interese hodi hanoin de’it povu no garante estabilidade,” Dom Virgílio do Carmo da Silva tenik.

Arsebispu Metropolitana Díli ne’e husu atu sarani hotu hola parte iha orasaun komún ne’e hodi harohan atu hatudu solidariedade ho povu Ukránia ne’ebé sofre.

Jornalista: Vito Salvador