Hatutan.com (28 Marsu 2022), Díli—Tribunál Distritál Díli (TDD), iha Segunda 28 fulan ne’e liu husi juiz kolektivu José Gonçalves, Argentino Nunes, Alvaro Maria Freitas kontinua hala’o julgamentu ba krime omesídiu agravadu, ne’ebé deskonfia involve arguidu na’in 18 tanba oho no so’e ona vítima Hendrique Soares iha arredór edifísiu Universidade da Paz (UNPAZ).
Arguidu na’in 18 mak hanesan Francisco Palmira, Feliciano Tilman, Dália Imaculada da Cruz, Francisco de Carvalho, Quintino Bianco, Santiago Pereira, José Lúcia, João Paulo, Alfredo Verato, Lucas Soares, João Soares, Joana da Silva, Deonísio Pereira, Leonito da Silva, Zeferino Carvalho, Germano Paulo, Natalino Ivo no João Câncio.
Notisia iha Relasaun:Kazu Omesídiu UNPAZ, Guarda Laiha Koñesimentu Kona-bá Matebian
Tuir ajenda TDD katak iha loron 28 fulan ne’e iha tuku 9:00 dader Tribunál kontinua rona seguransa UNPAZ arguidu Quintino Bianco no arguidu (prezu) Santiago Pereira.
Maibé, Tribunál la konsege rona ho razaun juiz la prienxe kolektivu ne’ebé iha tanba juiz Alvaro Maria Freitas kondisaun saúde la di’ak (moras).
Ho razaun refere halo Tribunál adi’a hikas julgamentu ba loron 04 fulan Abril tinan ne’e, hodi kontinua rona arguidu sira.
Antes ne’e, Ministériu Públiku (MP) akuza arguidu sira ba prátika krime omesídiu agravadu ne’ebé previstu iha artigu 139 hosi kódigu penál TL, relasiona ho kazu omisídiu ne’ebé akontese iha UNPAZ iha loron 20 fulan Juñu 2021, ne’ebé hamate ona Hendrique Soares.
Audiénsia julgamentu, prezide hosi juiz kolektivu José Gonçalves, Argentino Nunes, Alvaro Maria Freitas no MP reprezenta hosi Prokuradór Matias Soares, arguidu sira hetan asisténsia legál hosi Defensór Públiku Fernando no Advogada Privada Adelina Lobo, Virna Carvalho no Manuel Tilman.
Jornalista: Carmelita Isaac
