Justisa & Krime
Tribunál Bolu Funsionáriu PN Na’in-tolu ho Jerente Super Xerox
Hatutan.com, (30 Marsu 2022), Díli–Tribunál Distritál Díli (TDD), Kuarta (30/03/2022) hala’o primeiru julgamentu ba funsionáriu Parlamentu Nasionál (PN) na’in-tolu, inklui jerente prinsipál balun iha empreza Super Xerox Unip,Lda, tanba deskonfia komete krime partisipasaun ekonomia iha negósiu.
Edifisiu PN. Foto/Hatutan.com
Kazu krime ho númeru kriminál ka Nuc.0242/14.PDDIL ne’e, Ministériu Públiku nudár na’in ba asaun penál kondena arguidu sira ho insial JRM, LSC, no ABC hanesan funsionáriu iha PN ho jerente kompañia Super Xerox Unip.Lda ho inisiál ATJ relasiona ho fornesimentu farda inklui sapatu, fornesimentu ekipamentu eskritóriu ka ATK ho USB ba funsionáriu PN.
Tuir ajenda TDD katak iha primeiru audiénsia ne’e, Tribunál sei rona arguidu sira, maibé seidauk bele ho razaun arguido JRM ho ATJ la marka prezensa maske antes nee Tribunal notifika ona.
Alende ne’e, Tribuáal deside sei notifika direta ba arguidu na’in-rua nia hela fatin nune’e, iha julgamentu tuir mai bele marka prezensa. Ho ne’e, Tribunál adia hikas julgamentu ba loron 25 fulan-Outubru, tinan ne’e, hodi rona arguidu sira nia deklarasaun.Tuir akuzasaun husi Ministériu Públiku (MP) katak, iha tinan 2012 arguidu JRM asume kargu pesoa prinsipál ezekituvu nian iha PN, arguidu LSC nudár pesoál prinsipál iha divizaun patrimóniu lojistiku no arguidu ATJ nudár jerente prinsipál empreza Super Xerox Unipesoal Lda, maibe iha tinan 2012, arguidu JRM asina kontratu ho tipu adjudikasaun direita ho empreza 6 hanesan Empreza Dili Defence and Supplies Unip. Lda, Mape Jaya Unip. Lda, TL Tech Unip.Lda, SM Bark Tecnologia, Visio Dei Unip. Lda, Fo Timortur Hotel ba fornesimentu farda inklui sapatu, fornesimentu ekipamentu eskritóriu ka ATK, no USB ba funsionáriu PN, maske iha kontratu laran la mensiona valor kontratu ho kompañia sira.
Arguidu JRM aprova CPV no pedidu pagamentu hodi la verifika no halo inspesaun ba sasán ne’ebé empreza fornese.
Arguidu JRM uza kontratu ho númeru hanesan hodi justifika iha CPV, maibé númeru item, fornesimentu sasán no kompañia diferente. Tanba ne’e, Estadu halo pagamentu dobru ba item balun husi fornesimentu farda inklui sapatu, fornesimentu ekipamentu eskritóriu ka ATK, no USB ne’ebé ikus mai fo prejuízu ba Estadu ho valor $8,416.00.
Ho hahalok arguidu sira-nian ne’e, n MP akuza partisipasaun ekonomia iha negósiu ne’ebé previstu iha artigu 299 no krime burla agravadu ne’ebé previstu iha artigu 267 husi kódigu penal TL.
Audiénsia julgamentu preside husi juis koletivu José Gonçalves, Argentino Nunes, Alvaro Maria Freitas, MP reprezenta husi Prokuradora Lidia Soares no arguidu sira hetan asisténsia legal husi Defensor Públiku Nelson Borges.
Jornalista: Carmelita Isaac