Polítika
Partisipa Kampaña Segunda Volta, Prezidente Repúblika Hasai Férias Anuál
Hatutan.com, (01 Abríl 2022), Díli— Prezidente Repúblika (PR) Francisco Guterres Lú Olo, sei foti férias anuais loron sanulu resin lima.
Prezidente Repúblika, Francisco Guterres “Lú Olo”. Foto/Hatutan.com
Tuir Estatutu Titulares Órgauns Soberania, (númeru 4 artigu 10, Lei n°7/2007, 25 jullu altera hosi Lei n°7/2017, 26 abril), tinan-tinan, titulár no membru órgaun soberania sira iha direitu ba períodu férias loron 30.
Notisia iha Relasaun:PD Apoia Horta iha Eleisaun Segunda Volta Tanba iha Razaun Haat
“Liuhosi karta, ho data 30 Marsu 2022, Prezidente Repúblika informa ba Prezidente Parlamentu Nasionál katak, sei goza férias hosi 01 to’o 16 Abríl 2022, iha territóriu nasionál,” Hatutan.com sita komunikadu hosi Palásiu Prezidensiál Nicolau Lobato, Díli, Sesta (01/04/2022).
Tanba Prezidente Repúblika órgaun unipesoál ka ema ida de’it mak kaer, nia sei hala’o nafatin ninia knaar tuir Konstituisaun haruka durante períodu férias ne’e.
Francisco Guterres Lú Olo rasik, nu’udár kandidatu Prezidente Repúblika periudu 2022-2027 ho númeru sorteiu 2, ne’ebé tuir ajenda kampaña eleisaun segunda volta sei hahú iha 02 to’o 16 Abríl no sei realiza eleisaun iha 19 Abril 2022.
Jornalista: Vito Salvadór