Komunidade Musulmanu Hahú Tempu Hadera-An

Hatutan.com, (02 Abríl 2022), Díli- Komunidade musulmanu  iha mundu, inklui Timor-Leste hahú tama ba fulan-Ramadan ka fulan hadera-an , katak  moris iha orasaun nia laran atu bele hetan moris foun ba an rasik no ba sosiedade.

 Tinan ne’e, komunidade musulmanu iha mundu selebra loron Ramadan 1443H/2022M no iha Timor-Leste, komunidade musulmanu  sira sei selebra loron-boot Ramadan ho tema “Mai Ita Simu Ramadan ho Reverénsia, Jenerozidade no Auto-reflesaun”.

Xefe Fundasaun An-Nur Díli, Muhamad Anuar da Costa. Foto/Hatutan.com

Xefe Fundasaun An-Nur Díli, Muhamad Anuar da Costa ba Hatutan.com iha nia servisu fatin, Kampung Alor, Díli, Sábadu (02/04/2022) hateten, Ramadan ka jejúm ne’e nudár obrigasaun musulmanu sira-nian atu halo no sei reza kada loron to’o fulan ida tomak. inklui halo atividade reza hamutuk, ustad sira sei fó palestra hodi ko’alia kona-bá sentidu husi Ramadan ba komunidade musulmanu sira no sei iha mós dekor Al-Quran.

“Iha fulan Ramadan ita halo orasaun hamutuk no buat importante seluk mak ita sei buka atu halibur sasán sira ne’ebé ita iha hodi tulun ema seluk atu hatudu ita-nia sakrifisiu no domin ba sira be laiha kbiit tamba limitasaun umanu ruma ne’ebé sira enfrenta,” Muhamad Anuar da Costa hateten

Fulan Ramadan nudár mós tempu hafoun-an nian ba komunidade musulmanu tomak tamba ne’e hanesan komunidade minoritáriu iha Timor-Leste agradese ba Estadu no Governu liuliu ba povu Timor-Leste ne’ebé hatudu sira -ia maturidade hodi tau iha konsiderasaun toleránsia relijioza ne’ebé makas loos, la’ós de’it agora maibé dezde uluk kedas.

“Toleránsia relijioza iha Timor-Leste tenke sai modelu ba nasaun seluk. Ho fiar ka relijiaun fanun ita atu hamutuk iha unidade, domin no asaun ba dezenvolvimentu,” nia hateten.

Ramadan tuir prinsípiu doutrina relijiaun musulmanu nian iha objetivu atu hafoun hikas ema nia hahalok, perdua malu no hadi’a relasaun entre ema hodi forma família ida no komunidade ida ne’ebé forte ba nasaun ida forte tamba nia emar sira moris ho domin no dame.

Jornalista: Vito Salvador