Timoroan Na’in-48 Mate Tanba Dengue

Hatutan.com, (03 Abríl 2022), Dili—Dadus situasaun kazu dengue iha Timor-Leste husi Ministériu Saúde to’o loron 03 fulan Abríl 2022, hatudu katak timoroan na’in-48 mak mate ona tanba dengue.

Foto/Foti husi Google

Komunikadu imprensa husi Ministériu Saúde aprezenta katak  kazu dengue hamutuk 3894 no kumulativu óbitu na’in-48. Total kazu dengue ne’e  maioria deteta husi Munisípiu Dili ho total kazu 2589, Baucau ho kazu 239, Manatuto ho kazu 172, Manufahi kazu 159, Lautem ho kazu 148, Covalima ho kazu 126, Liquiça kazu 109, Ermera ho kazu 107, Aileu ho kazu 87, Viqueque 64, Ainaro ho kazu 45, Bobonaro ho kazu 44, no RAEOA ho kazu 5.

Situasaun kazu Dengue Iha Dili

Munisípiu Dili to’o ohin loron relata ona kazu 2589 no óbitu na’in-26. Tuir kalendáriu epidemiolojia Tinan 2022, iha primeira semana Munisípiu Dili relata ona 38 kazu, iha segunda semana relata 158 kazu, iha Terceira semana relata ona 123 kazu, iha kuarta semana relata kazu ho total 243, iha kinta semana relata kazu ho total 281, iha sesta semana relata kazu ho total 257, iha sétima semana relata kazu 202, iha oitavu semana relata kazu ho total 115, iha nonu semana relata kazu ho total 218 kazu, iha désimu semana relata kazu ho total 200, iha désimu primeiru relata kazu ho total 223 kazu, iha désimu segundu semana relata kazu ho total 183, iha désimu terseiru semana relata kazu ho total 195 kazu no iha désimu kuartu semana relata kazu ho total 153.

Ministériu Saúde Apela

Apela ba populasaun iha Dili laran no mós iha munisípiu sira seluk, atu aprezenta-an iha fasilidade públiku saúde (Sentru Saúde ka Ospitál) ne’ebé besik, bainhira sente isin-manas, ka sente laran-sa’e, liman-ain no sikun moras hodi bele hetan atendimentu husi profisionál saúde sira.

Apela mós ba populasaun iha Dili laran no mós iha munisípiu sira seluk atu:

1. Husu ba Autoridade Munisípiu no Autoridade lokál atu bele orienta komunidade halo limpeza jerál iha suku no bairu-bairu.
2. Fase tanke, Bidon ka balde tau bee semana ida dala ida.
3. Hamos sasán ka limpeza hanesan roda at, vazu ai-funan atu susuk labele tau tolun.
4. Haloot roupa ho di’ak iha Ita Nia Uma laran.
5. Uza roupa ne’ebé liman naruk karik toba iha tempu loron.
6. Uza ai-moruk hanesan repelente ka autan.
7. Uza moskiteiru karik toba iha tempu loron.
8. Soe lixu iha nia Fatin

 Jornalista: Carmelita Isaac