Kazu Projetu Instalasaun Set-top Box, Prezidente RTTL,E.P Presta Deklarasaun iha CAC

Hatutan.com, (04 Abríl 2022), Dili–Prezidente Konsellu Administrasaun Rádiu Televizaun Timor Leste, Empreza Públiku (RRTL,E.P),  José António Belo, Segunda (04/04/2022), marka prezensa iha Edifísiu Komisaun Anti-Korrupsaun (CAC) iha Farol, Dili, hodi kumpre ba notifikasaun presta deklarasaun iha  CAC.

Notísia iha Relasaun: Kazu Projetu Set-top Box RTTL,E.P, CAC Bolu Ona Sasin Husi MAPKOMS ho RTTL

Prezidente Konsellu Administrasaun RTTL,E.P, José António Belo, presta deklarasuan iha CAC, Segunda (04/04/2022). Foto/Hatutan.com

CAC notifika prezidente RTTL,E.P. José António Belo, hanesan sasin hodi konfirma dadus pertinente balun liga ho projetu instalasaun Set-top Box/dexodificador RTTL,E.P ne’ebé iha indísiu krime abuzu podér no  korrupsaun.

Prezidente RTTL, E.P ne’e marka prezensa iha CAC iha  tuku 9:09 Otl no prosesu investigasaun hala’o durante oras tolu nia laran hahú husi tuku 9:09 to’o tuku 12:21 meiudia.

“Ha’u mai presta deklarasaun nudár sasin, relasiona ho buat ruma ka laleok balun ne’ebé iha ligasaun ho ha’u nia servisu hanesan prezidente Konsellu Administrasaun RTTL,E.P, maibé ha’u labele fó sai buat ruma ne’ebé liga ho segredu justisa,” Prezidente RTTL, E.P José António Belo ba jornalista sira hafoin presta deklarasaun iha CAC.

Notísia iha Relasaun: Prezidente RTTL,E.P La Fó Komentáriu Ba Projetu Instalasaun Set-top Box RTTL,E.P.

Relasiona ho kazu instalasaun Set-top Box/dexodificador RTTL,E.P ne’e, CAC bolu ona sasin prinsipál na’in-neen (6) husi Ministériu Asuntu Parlamentár no Komunikasaun Sosiál (MAPKOMS) ho RTT,E.P hodi rona sira-nia deklarasaun ka depoimentu.

Prezidente Konsellu Administrasaun RTTL,E.P. José António Belo. Foto/Hatutan.com

Iha delegasaun kompeténsia husi Ministériu Públiku (MP) ba CAC ne’e ho durasaun loron 45 hodi rona depoimentu husi sasin sira no ikus mai sei submete rezultadu investigasaun ba MP hodi halo analiza no bainhira sei iha falta ruma, MP sei haruka fali despaxu própriu ho orientasaun klaru ba CAC hodi halo reabertura hodi fó sekuénsia ba orden MP nian.

Ministériu Públiku delega kompeténsia ba CAC hodi hahú arrola sasin sira atu ba presta deklarasaun iha CAC, kona-bá indísiu krime ne’ebé iha relasaun ho projetu  instalasaun Set-top box/dexodificador RTTL,E.P.

Projetu instalasaun Set-top Box/dexodificador RTTL,E.P ne’e ho nia kustu $900,000.00, deskonfia Ministru Asuntu Parlamentár no Komunikasaun Sosiál (MAPKOMS), Francisco Martins da Costa  Pereira Jerónimo, nudár mós Prezidente Federasaun Futeból Timor Leste (FFTL) estabelese kontratu ho empreza   DILI ETERNAL INNOVATION INFORMATION, Lda nudár sósiu husi Melánia da Silva Fernandes Capela nudár Sekretaria iha Gabinete Prezidente FFTL.

Notísia iha Relasaun: Direitu Bá Resposta Husi MAPKOMS Kona-bá Projetu Intalasaun Set-top Box RTTL,E.P

Jornalista: Carmelita Isaac