Privatiza Taxa Alfándega, MP husu TDD Aplika Pena Suspensaun ba Broker Na’in-tolu

Hatutan.com, (05 Abríl 2022), Díli—Ministériu Públiku (MP) liu husi alegasaun husi Prokuradora Lidia Soares, husu ba Tribunál Distritál Díli (TDD) atu aplika pena prizaun tinan-tolu no suspende tinan-tolu ba Broker na’in-tolu ho inisiál DCS, MM ho AM.

Tribunál Distritál Dili (TDD). Foto/Espesiál

Arguidu na’in-tolu ne’e deskonfia krime falsifikasaun agravado, abuzu konfiansa forma kontinuada, kontrafasaun ba selu, kunu, marka ka xansela ho forma kontinuada, relasiona ho pagamentu taxa alfándega husi kompañia Kmanek Supermerkadu, kompañia Rui Soares Martin no To order of Timor Global ne’ebé fó prejuizu ba Estadu ho total $63,954.00.

Maske kompañia entrega ona osan ba arguidu hodi ba selu iha Banku Nasional Ultramarinho (BNU), maibé arguidu utiliza fali karimbu BNU falsu hodi komprova ba APORTIL no kompañia katak nia selu ona taxa, maske osan refere arguidu utiliza ba nesesidade privadu.

Razaun MP husu pena suspensaun ne’e, tanba konsidera faktu provadu bazeia ba konviksaun arguidu-na’in tolu durante prosesu julgamentu katak loos dunik arguidu sira prodús karimbu BNU falsu hodi hatudu ba APORTIL no kompañia hodi komprova katak taxa alfándega nian selu ona, nune’e konteiner kompañia nian bele sai ona husi Portu-Dili.

MP mós haree ba sirkunstánsia hotu ne’ebé bele hakmaan arguidu maka sira konfesa ba aktu hotu ne’ebé sira halo no koopera di’ak ho justisa tanba antes julgamentu arguidu DCS devolve ona ho montante $280, arguidu MM devolve ona $500 no AM devolve ona $500.

Parte Advogada privada Adelina Lobo no Defensor Públiku (DP) Nelson Borges husu ba Tribunál atu aplika pena ne’ebé adekuadu tuir konviksaun no sirkunstánsia ne’ebé iha.

Hafoin alegasaun juiz prezide marka hikas audiénsia ba loron seluk hodi rona desizaun.

Audiénsia julgamentu prezide hosi juis koletivu Zulmira Auxiliadora, Ana Paula Fonseca, Maria Solana, MP reprezenta hosi Prokuradóra Lidia Soares no arguidu sira hetan asisténsia legál hosi Advogadu privada Adelina Lobo no Defensor Públiku (DP) Nelson Borges.

Jornalista: Carmelita Isaac