Komisaun G husu MJ Renova Pasaporte Estudante 47 iha Filipina ho Vietnam

Hatutan.com (07 Abríl 2022), Díli—Komisaun G Parlamentu Nasional (PN) ne’ebé trata asuntu Edukasaun, Juventude, Desportu no Sidadania, Kinta (07/04/2022),  halo audiénsia ho Ministériu Justisa (MJ) hodi husu MJ halo renovasaun ba pasaporte estudante hamutuk 47 iha Filipina ho Vietnam ne’ebé maka sira-nia pasaporte besik inválidu ona.

Prezidente Komisaun G PN, António Verdial Foto/Média PN.

Prezidente Komisaun G ho nia komitiva  hasoru diretamente Ministru Justisa (MJ), Tiago Amaral Sarmento, ho hanoin hakarak kolabora no hametin kooperasaun ho koordenasaun hodi husu no hato’o preokupasaun ne’ebé estudante sira enfrenta iha Filipina ho Vietnam.

“Tuir informasaun ne’ebé ha’u iha katak estudante ne’ebé eskola iha Nova Zelándia, Austrália, Indonézia, Portugal, Vietnam, Filipina sira-nia pasaporte kaduka ona, signifika pasaporte mate ona no balun atu mate ona, tanba ne’e ha’u hakarak hametin kolaborasaun, kooperasaun, koordenasaun maka ha’u ho ekipa husi komisaun G mai MJ no rona resposta MJ nian ne’e maka nia halo kedas despaxu ba Diretór Jerál Notariadu no iha tempu badak sei manda ekipa ida ba nasaun ne’ebé Timor oan eskola ba espesiál Vietnam no Filipina hodi trata asuntu ida ne’e,” Prezidente Komisaun G, António Verdial ba jornalista sira hafoin hasoru malu ho MJ iha edifísiu MJ, Colmera-Dili.

Tuir informasaun ne’ebé komisaun ne’e simu katak maioria estudante sira ne’ebé eskola iha  Nova Zelándia, Austrália, Indonézia, Portugal, Vietnam, Filipina sira nia pasaporte mate no balun atu mate ona, maske dadus husi nasaun balun komisaun ne’e seidauk simu, maibé estudante 47 iha Vietnam no Filipina sira nia pasaporte inválidu ona no balun atu inválidu tan.

Jornalista: Carmelita Isaac