Lú Olo Garante Normaliza Funsionamentu Instituisaun Estadu Sira

Hatutan.com, (08 Abril 2022), Viqueque-Kandidatu Prezidente Repúblika (PR) 2022-2027 ho númeru sorteiu rua (2) ba eleisaun prezidensiál segunda volta, Francisco Guterres “Lú Olo” hateten, bainhira hetan duni fiar hosi povu hodi re-eleitu ba Prezidente Repúblika,  nia sei garante normaliza funsionamentu servisu entre instituisaun sira Estadu nian.

Notísia iha Relasaun: Kampaña Lú Olo iha Viqueque, Militante FRETILIN Kestiona Ró Haksolok

Kandidatu PR 2022-2027, Francisco Guterres “Lú Olo”. Foto/Media Kandidatu Lú Olo

“Ha’u hakarak atu hatete ba Viqueque oan sira, ha’u sai kandidatu dala-ida tán ba Prezidente Repúblika para atu ba garante normál funsionamentu instituisaun Estadu ninian, para atu labele iha tán ema ida atu halo intervensaun ba órgaun  soberania sira-nia kna’ar no sira-nia kompeténsia,” Francisco Guterres “Lú Olo” hateten intervensaun polítika durante halo diálogu aberta ho komunidade sira iha Kampu Futeból Munisípiu Viqueque  Sesta (08/04/2022).

Durante diálogu, “Lú Olo” mós rejeita ho informasaun barak ne’ebé lansa iha públiku katak, Sekretáriu Jerál partidu Frente Revolusionáriu ba Timor-Leste Independente (FRETILIN), Marí Alkatiri maka volante fali nia (Lú Olo).

“Volante halo nusa? Doutór Marí Alkatiri ninia lei de’it iha sétimu Governu nian, sei hitu ka ualu hanesan ne’e, ha’u veta hotu sira nia lei, halo nusa maka nia regula fali ha’u? Ha’u hanoin kondutór para atu regula remote ne’e, seluk ida karik. Ne’ebé Viqueque oan seidauk koñese karik, sé tilun ba para hodi rona, hodi hatene di’ak liután ba aban bain-rua,” Francisco Guterres “Lú Olo” hateten.

Ho razaun sira ne’e hotu maka, motiva liután Lú Olo hodi re-kandidata aan ba PR períodu 2022-2027, atu bele hametin relasaun institusionál ida, entre Prezidente Repúblika ho órgaun ezekutivu Governu nian, nune’e, Primeiru-Ministru bele hala’o ninia kna’ar ho di’ak, no bele implementa ninia programa sira kona-bá atu hadi’a povu nia moris.

“Atu fó bee-moos ba povu ka atu hadi’a povu nia oan sira nia eskola, ka atu bele hadi’a agrikultura, ka atu halo estrada sira hotu, órgaun ezekutivu ninia programa tenke la’o, só tenke prezidente ida tenke iha sorin, para atu bele tahan. Tanba ne’e mak, ha’u sai kandidatu para atu bele servisu hamutuk ho órgaun ezekutivu ida ne’ebé mak mai,” Lú Olo afirma.

Prezidente partidu FRETILIN no mós atuál Prezidente Repúblika ne’e dehan, Oitavu Governu ninia mandatu sei hotu iha 2023. Maibé nia mandatu nudár PR, sei hotu iha loron 20 fulan-Maiu 2022.

Prezidente Repúblika iha mós kna’ar ida hodi hala’o relasaun institusionál ho Parlamentu Nasionál. PN mak halo lei, no aprova lei sira, halo desizaun polítika, no mós halo fiskalizasaun ba órgaun ezekutivu sira nia lala’ok servisu.

“Ida ne’e, sira nia kna’ar. Maibé lei ida fali ne’e, la natoon de’it ba parlamentu nasionál aprova. Sei haruka fila-fali ba prezidente da repúblika, para prezidente atu promulga ka, ou atu veta,” Lú Olo esplika.

Jornalista: Rogério Pereira Cárceres