Lautem-oan Sira Diskorda ho SEAK Ne’ebé Dehan Uma-Lisan Lejeavál Laiha Valór Kulturál

Hatutan.com, (09 Abríl 2022), Lautem-Reprezentante povu Munisípiu Lautem, Jacinto da Costa, ne’ebé nudár mós sekretáriu iha administrasaun Munisipál Lautem, diskorda ho deklarasaun Sekretáriu Estadu Arte no Kultura (SEAK), Teófilo Caldas, ne’ebé dehan, uma-lisan Lejeavál Lautem nian laiha nia valór kulturál.

Uma-lisan Lejeavál Lautem ne’ebé ahin han foin lalais ne’e. Foto/Espesiál

Jacinto da Costa informa, antes ne’e, Governu liuhosi SEAK rasik hamosu nia programa ida kona-bá oinsá mak atu bele tau matan uma-lulik sira, liu-liu halo reabilitasaun ba uma-lisan sira ne’e. 

Ho planu hosi SEAK ne’e, iha ona mós populasaun balu ne’ebé reprezenta hosi kada uma-kain, ho inisiativa hodi submete duni proposta ba SEAK, kona-bá atu halo reabilitasaun ba uma-lisan sira iha Munisípiu Lautem.

Iha programa ida ne’e, parte sekretáriu Munisípiu Lautem nian, seidauk iha informasaun ruma ho serteza. Maibé iha komunidade balu hosi Postu Administrativu Luro nian mak konsege hetan duni tulun orsamentu hosi SEAK.

Maske nune’e, iha fatin barak maka seidauk hetan apoiu ruma hosi Governu atu halo reabilitasaun ba sira-nia uma-lulik, dala-ruma mós ho razaun tanba uma-lisan sira iha Lautem kustu aas, tuir medida uma-lisan nian.

“Infelizmente, ha’u rona liafuan ida hosi SEAK, dehan, uma-lisan Lejeaval Lautem nian, laiha valór kultura, ida ne’e lamentável tebes ho liafuan sira ne’e, ne’ebé ami nia katuas lia-na’in sira balu hamulak, ko’alia tán hanesan ne’e, rai-na’in sei babeur nia, uma-lisan laiha valór ne’e mak sei babeur nia,” Sekretáriu Administrasaun Munisipiu Lautem, Jacinto da Costa hateten ba jornalista sira iha Lospalos Vila, Sábadu (09/04/2022).

Ba deklarasaun SEAK nian ne’e, iha tempu besik, hafoin eleisaun, lia-na’in sira sei realiza konferénsia imprensa ida, hodi hato’o kritika hasoru membru Governu ne’e, tanba hasai deklarasaun ida ne’ebé konsidera hamonu dignidade uma-lisan Lejeavál Lautem-oan sira nian.

Sira husu ho antesipadamente Sekretáriu Estadu Arte no Kultura (SEAK), Teófilo Caldas, atu dada fila nia liafuan, hodi husu mós deskulpa uluk ba povu Lautem, molok iha reajen ruma.

Jornalista: Rogério Pereira Cárceres