Lautem
Lú Olo Promete Dezenvolvimentu Integradu ba Povu
Hatutan.com, (09 Abríl 2022), Lautem-Kandidatu Prezidente Repúblika (PR) 2022-2027 ho númeru sorteiu rua (2), Francisco Guterres “Lú Olo”, promete ba povu Lautem katak bainhira eleitu ba Prezidente Repúblika mandatu daruak nian, nia sei halo dezenvolvimentu ida integradu ba Timor-Leste.
Notísia iha Relasaun: Lú Olo Garante Normaliza Funsionamentu Instituisaun Estadu Sira
Militante FRETILIN ho Os Verdes Timor iha Munisípiu Lautem. Foto/Espesiál
“Ha’u hakarak maka, atu hala’o dezenv0lvimentu ida integradu, sustentável ba ita-nia rai, ba ita-nia povu, ba ita-nia oan sira, para atu nune’e sira bele moris di’ak iha tempu oin mai,” Francisco Guterres “Lú Olo” hateten durante intervensaun iha kampaña ho modelu komísiu iha kampu 745, Aldeia Puihoro, Suku Home, Lospalos Vila, Sábadu (09/04/2022).
Lú Olo sente onra boot tebetebs hodi hamutuk ho partidu polítiku sira seluk, atu reforsa ninia kandidatura iha segunda ronda eleisaun ba Prezidente Repúblika segunda vota nian ne’e.
“Onra boot liu, bainhira nia hamriik nafatin ho povu iha Munisípiu Lautem nia oin, hodi hakat tán dala-ida iha segunda ronda, iha loron 19 fulan-Abríl, atu ba urna, hodi vota ba ha’u nia kandidatura,” hateten Lú Olo.
Kandidatu ba Prezidente Repúblika hosi partidu FRETILIN ne’e, husu ba Lautem-oan sira atu kontribui tán votu Tenente Jenerál reformadu, Tito Crisóvão da Costa “Lere Anan Timur” nian, ba nia hodi fó vitória ba nia iha eleisaun segunda volta ne’e.
Lú Olo mós fiar metin katak, ho apoiu sira hosi partidu boot, hanesan Partidu Libertasaun Populár (PLP), Kmanek Haburas Unidade Nasi0nál Timoroan (KHUNTO), Os Verdes de Timor, FRENTE-MUDANÇA hodi hamutuk ho FRETILIN nian, atu bele vota tán nia eleisaun prezidensiál ne’e.
“Ha’u manán fila-fali para atu ba hametin Estadu Direitu Demokrátiku. Atu ba kumpre de’it Konstituisaun ho Lei,” Lú Olo promete tán.
Kandidatu PR ho númeru sorteiu 2, haktuir katak, iha primeira ronda, esforsu tomak hosi Ramos Horta, nudár premiadu Nobel da Paz, no José Alexandre Kay Rala Xanana Gusmão, nudár honoris causa, atu elimina tiha kedas Lú Olo iha primeira ronde. Maibé, la konsege, tanba votu ne’ebé maka iha Munisípiu Lautem hodi ba to’o iha rai-klaran, to’o rai-ikun, fó nafatin ba FRETILIN.
Lú Olo dehan, Xanana ho Horta, nudár ema hotu hateten katak, sira iha imajen internasionál, mundu tomak koñese de’it mak sira na’in-rua, mas la konsege manan iha eleisaun primeira volta iha 19 fulan-Marsu liubá.
Jornalista: Rogério Pereira Cárceres