Domingu-Ramus, Hanoin Kristu Nia Glória no Paixaun

Hatutan.com, (10 Abríl 2022), Baucau-Uma-kreda Katóliku iha mundu no iha Timor-Leste, Domingu (10/04/2022), selebra misa Jesus Nia glória liuhusi tradisaun Domingu-ramus.

Domingu-Ramus iha Igreja Katedral Santu António Baucau, 10 fulan-Abríl 2022. Foto/Hatutan.com

Sarani Katóliku Dioseze Baucau mós selebra misa domingu-ramus ne’ebé prezide husi Administradór Apostoliku Dioseze Baucau, Pe. Alipio Pinto Gusmão. Tuir nia, selebrasaun domingu-ramus lori ema fiar na’in tomak ba reflesaun ida profunda kona-bá  Kristu Nia glória no paixaun.

Administradór Apostoliku Dioseze Baucau, Pe. Alipio Pinto Gusmão, iha omilia ba sarani-sira iha igreja Katedral Santu António Baucau, hateten  Kristu Maromak lolos, maibé la hatudu-an nudár Maromak no haraik an hanesan atan to’o mate iha Kruz.

Iha selebrasaun Domingu-ramus liturjia da palavra hahú ho Kristu Nia glória, ema hahí hodi dehan, “Ho Sana David Nia-oan.  Rahun di’ak ba ida ne’ebé mai hodi Nai Nia Naran.”  Maibé, liu tiha ida-ne’e Kristu hahú simu nia paixaun, terus to’o mate iha kruz leten tanba domin ba Nia povu.

“Kristu Nia glória no paixaun, buat rua ne’ebé labele haketak,” Pe. Alipio Pinto Gusmão hateten.

Igreja Katedral Santu António Baucau. Foto/Hatutan.com

Nia dehan, tan Maromak Nia laran luak, Kristu simu glória no paixaun atu lori salvasaun ba umanidade. Iha kruz mak Maromak hatudu nia-kbiit makas liután tamba iha kruz mak Nia mate no moris hias.

Nia hatutan ko’alia kona-bá paixaun Kristu nian lori realidade ne’ebé ema halo iha moris hodi ladook husi krime ka hahalok aat, haterus ema seluk husi ne’e ema fiar nai’n tenke konsiente katak tamba nia hahalok aat mak Kristu terus no mate atu hetan hikas glória husi Aman-Maromak tanba manan ema nia moris.

Administradór apostoliku ne’e salienta liután katak iha moris dala-ruma ema sei foti no tane ita hanesan liurai-boot, maibé keta haluhan iha momentu balun ita sei simu terus tamba ódiu no vingansa, maibé ne’e hotu hanesan ema fiar-na’in tenke lori hodi hakat ho esperansa ba moris foun.

Nia husu atu sarani sira kontinua moris ho espíritu haraik-an nian hodi simu semana Santa ho ksolok no fiar iha Maromak.

Jornalista: Vito Salvador