CNE Halo Ajudikasaun Direta ho RTTL,EP ba Debate Horta-Lú Olo

Hatutan.com (11 Abríl 2022) Díli— Comisão Nacional das Eleicões (CNE) halo ajudikasaun direta ho Rádio Televizaun Timor Leste, Empreza Públika (RTTL,EP), hodi halo transmisaun direta ba debate públiku entre kandidatu Prezidente Repúblika, José Manuel Ramos Horta ho Francisco Guterres Lú Olo.

Razaun CNE halo ajudikasaun direta ho RTTL,EP tanba tempu badak liu no esperiénsia ho Grupu Média Nasionál (GMN) iha debate primeira volta ne’ebé iha fallansu bo’ot no prezudika eventu importante ne’e.

Notisia iha Relasaun:Debate Públiku Kandidatu PR, CNE Deside GMNTV Tanba Kualidade no Baratu Liu RTTL,E.P

“Tanba iha tempu badak liu atu loke konkursu, entaun CNE halo ajudikasaun direta hodi indika diretamente RTTL,EP mak fó-sai debate ne’e. Ho esperiénsia ida uluk ho GMN ne’ebé iha mós fallansu bo’ot ida,” Vise Prezidente CNE, Domingos Barreto ba Hatutan.com via telefónika, iha Segunda (11/04/2022).

Debate ne’ebé sei hala’o iha loron 13 fulan ne’e, sei konvida kandidatu sira seluk ne’ebé partisipa ona iha debate dahuluk, inklui embaixadór Xina, Uniaun Europeia ne’ebé sei halibur ema hamutuk atus ha’at (400).

Kona-bá orsamentu, parte CNE ho RTTL,EP seidauk deside, maibé montante sei la hanesan ho debate dahuluk tanba kandidatu na’in-rua de’it ho durasaun tempu oras rua no CNE halo akordu ona ho RTTL,EP katak balun CNE mak sei responsabiliza no balun RTTL,EP mak sei responsabiliza.

Kona-bá moderadór ba debate ne’e, CNE deside Padre Bento Barros Perreira ne’ebé iha mós esperiénsia oinsa atu modera atividade hirak ne’e.

Antes ne’e, iha debate dahuluk GMN mak sai hanesan manán-na’in ba konkursu hodi halo transmisaun direta, maibé durante debate ne’e la’o iha fallansu boot no hetan reasaun makás hosi públiku.

Debate ne’e rasik, sei hala’o iha loron 13 fulan ne’e tuku 19:00 kalan iha salaun Oka, Osindu, Díli.

Jornalista: Carmelita Isaac