Omisídiu Fahilebu, Tribunál Aplika Prizaun Preventiva ba Arguidu AF

Hatutan.com, (11 Abríl 2022) Díli-Tribunál Distritál Díli (TDD) liu husi juiza singular Ana Paula Fonseca, deside no aplika medida koasaun Prizaun Preventiva (PP) ba arguidu ho inisiál AF tanba uza katana hakotu vítima Francisco dos Santos ho Edito Soares, iha loron 07 fulan-Abríl ne’e.

Notísia iha Relasaun: Bispu-Padre Sira Hametin Uniaun ho Misa Krizmál, Ran Fakar iha Fahilebu

Vitíma omisídiu iha Suku Fahilebu, Postu Administrativu Bazartete, Munisípiu Liquiça, 07 fulan-Abríl 2022. Foto/Espesiál

Liu husi audiénsia primeira interrogatóriu iha TDD, Segunda (11/04/2022), Juiza Ana Paula Fonseca aprezenta razaun hodi aplika medida koasaun ne’e, tanba iha indísiu forte ba krime omisídiu simples ho nune’e medida koasaun ne’e atu asegura arguidu nia prezensa durante prosesu investigasaun.

Maske iha audiénsia arguidu hili nia direitu nonook, maibé Tribuáal intende katak faktus loos.

Iha primeiru interrogatóriu refere, Ministériu Públiku ne’ebé reprezenta husi Prokuradór Napolião Soares da Silva, promove arguidu ba krime omisídiu simples ne’ebé previstu iha artigu 138 husi kódigu penal Timor-Leste.

Iha loron 07 fulan-Abríl 2022 iha Suku Fahilebu, Postu Administrativu Bazartete, Munisípiu Liquiça, arguidu ho vítima sira halo preparasaun limpeza hodi simu ilas São João de Brito, maibé iha atividade  ne’e arguidu no vítima sira ko’alia halimar, derrepente de’it arguidu foti katana hodi taa vítima na’in-rua iha parte kakorok hodi rezulta mate fatin.

Arguidu hetan asisténsia legal husi Defensoria Públiku Estaque Guterres iha audiénsia julgamentu ne’e.

Jornalista: Carmelita Isaac