Saúde
Bispu Maliana To’o Hikas TL Hafoin Hala’o Tratamentu Saúde iha Malázia
Hatutan.com, (13 Abríl 2022), Díli—Prezidente Conferência Episcopal Timorense (CET) no Bispu Dioseze Maliana, Dom Norberto do Amaral fila hikas mai Timor Leste (TL) ho aviaun Batik Malázia, iha Kuarta (13/04/2022) tuku 09:15 otl, hafoin iha loron 23 fulan Marsu hala’o tratamentu saúde iha Malázia.
Prezidente Conferência Episcopal Timorense (CET) no Bispu Dioseze Maliana, Dom Norberto do Amaral fila hikas mai Timor Leste (TL) ho aviaun Batik Malázia, iha Kuarta (13/04/2022) tuku 09:15 otl, hafoin iha loron 23 fulan Marsu hala’o tratamentu saúde iha Malázia. Foto/Hatutan.com.
Iha aeroportu internasionál Prezidente Nicolau Lobato, Dom Norberto do Amaral simu direta hosi Sekretáriu CET, Padre Leandro Maria Alves, Vigáriu Jerál Dioseze Maliana, Padre Lúcio de Deus, hamutuk ho kleru sira Dioseze Malina no líder karismátiku Kay Rala Xanana Gusmão hamutuk ho Sekretáriu Jerál Partidu CNRT Francisco Kalbuadi Lay, Sekretáriu Jerál Partidu Demokrátiku (PD), António da Conceição “Kalohan” inklui sarani sira hosi Dioseze Maliana no Díli.
Bispu Dioseze Maliana Dom Norberto do Amaral sofre moras hipertensaun, nune’e iha loron 28 fulan-Fevereiru 2022 kalan ba hala’o tratamentu saúde intensivu iha Intensive Care Unit (ICU) HNGV.
Vise Sanseler Dioseze Maliana, Padre Levinson Verdial, ne’ebé akompanña Dom Norberto do Amaral iha Malázia hateten, tratamentu Bispu nian la’o ho di’ak desde to’o iha Malázia.
Durante iha Malázia doutór sira ospitál Malázia nian la’o tuir abstratu ne’ebé fó hosi Hospital Nacional Guido Valadares (HNGV), médiku sira mós halo hikas chek up, hodi haree no detekta ho loloos moras ne’ebé maka Bispu iha to’o ikus saúde Bispu nian rekopera no falta de’it terapia no sira rekomenda atu bele halo mós iha Timor Leste.
“Buat hotu-hotu la’o di’ak no Amu Bispu nia saúde rekoperadu, falta de’it terapia Amu Bispu rekopera totál. Ohin ami bele fila mai Timor tanba médiku sira rekomenda atu terapia, ne’e bele halo de’it iha Timor tuir sira nia rekomendasaun,” Padre Levinson Verdial hateten ba jornalista sira iha Aeroportu Internasional Nicolau Lobato, Kuarta (13/04/2022).
Prezidente Conferência Episcopal Timorense (CET) no Bispu Dioseze Maliana, Dom Norberto do Amaral fila hikas mai Timor Leste (TL) ho aviaun Batik Malázia, iha Kuarta (13/04/2022) tuku 09:15 otl, hafoin iha loron 23 fulan Marsu hala’o tratamentu saúde iha Malázia. Foto/Hatutan.com.
Médiku espesialista sira rekomenda atu Amu Bispu labele ativu lai iha nia servisu sira hodi deskansa no halo terapia ho di’ak no tuir rekomendasaun médiku sira nian, nune’e Amu Bispu bele rekopera totalmente hosi moras sira ne’ebé sofre.
“Amu Bispu sei halo de’it terapia iha rezidénsia no tuir nafatin orientasaun ne’ebé médiku sira rekomenda atu halo tuir,” nia haktuir.
Aproveita biban ida ne’e Padre Levinson hodi kleru Diosezanu Maliana tomak nia naran hakarak agradese ba sarani hotu iha Timor laran tomak ba tulun tomak ne’ebé sarani sira fó liu hosi orasaun, ba Nailulik no Madre sira, inklui konfisaun relijiozu sira, ba Estadu ho Governu ne’ebé durante ne’e apoiu Amu Bispu liu hosi orasaun no vizita sira ne’ebé halo durante baixa iha HNGV no iha Malázia.
Jornalista: Vito Salvadór