STAE Transporta Materiál Sensitivu Bá Sentru Votasaun Sira

Hatutan.com, (18 Abríl 2022), Díli—Sekretariadu Tékniku Administrasaun Eleitorál  (STAE) hahú halo transportasaun materiál sensitivu no la’ós sensitivu hanesan urnas no bulletin de votus ba sentru votasaun 130 iha kapital Díli bá votasaun segundu volta ne’ebé sei realiza iha loron 19 Abríl 2022.

Lee Mós: STAE Transporta Ona Materiál Sensitivu ba Sentru Votasaun 130 iha Díli

Materiál sensitivu no naun sensitivu. Foto/Facebook.

Molok halo transportasaun materiál hirak ne’e bá iha sentru votasaun, STAE Munisipál sira hala’o uluk verifikasaun ba buletin  votu sira ne’ebé nakles ka fo;er nune’e labele utiliza.

“Ohin to’o ona iha faze distribuisaun materiál sensitivu no la’ós sensitivu ba sentru votasaun sira ne’ebé hala’o iha Munisípiu 13, inklui RAEO no iha rai-li’ur,  ami transporta ona iha loron 13, so iha Inglaterra maka material foin transporta husi embaixada ba sentru votasaun sira, maibé atu dehan de’it katak molok halo transportasaun material sira ba sentru votasaun antes ne’e STAE Munisipál sira halo verifikasaun ba buletin  votu sira no rezultadu hatudu katak ida ka rua maka nakles ka fo’er tanba ne’e sira lansa akta no karimbu atu labele utiliza,” Diretór Jerál  STAE, Acilino Manuel Branco ba jornalista sira iha ninia knar fatin Caicoli-Dili, Segunda (18/4/2022).

STAE nafatin mantein ho lista eleitór iha votasaun primeiru ronde, inklui fiskál sira no funsionáriu ho media sira, maibé iha aumentu ida ka rua eleitór foun liu-liu hirak ne’ebé foin kompleta tinan 17 iha loron 19 fulan-Abríl ne’e, tanba iha eleisaun primeira volta eleitór barak maka iha ona kartaun eleitorál maibé seidauk kompleta tinan 17.

Kona-bá estudante ne’ebé lista naran la rejistradu iha sentru votasaun paralelu, Governu prepara ona karreta hodi transporta sira ba idak-idak nia munisípiu hodi ezerse sira nia direitu ba vota.

Nia esplika, depois de transportasaun, material hirak ne’e sei hela iha kada sentru votasaun durante kalan ida ne’ebe asegura husi brigade, ofisial CNE, fiskál no seguransa husi PNTL, maibé to’o aban dadeer tuku 6:00 parte seguransa sei entrega materiál hirak ne’e bá brigada no ofisiál hodi hahú halo preparasaun ba votasaun no tuku 7:00 dadeer komunidade hotu bele ezerse direitu votu to’o tuku 15:00 lokraik. Maibé depende ba kada sentru votasaun karik iha tuku 15:00 lokraik maka eleitór sei barak iha formatura maka votasaun kontinua la’o to’o remata.

Utilizasaun urna la’ós utiliza de’it hodi tau buletin  votu, maibé tau mós lista votante sira no karik iha sentru votasaun ida maka eleitór sira barak liu maka bainhira urna nakonu bele troka fali.

Daudaun STAE mós prepara sistema tabulasaun apuramentu ne’ebé instaladu ona iha sentru apuramentu munisipál 13, inklui RAEO no depois kontajen akta sira husi Munisípiu sei tama iha apuramentu nasional STAE no sei kontinua sura no sei remata iha loron 21 fulan-Abríl no rezultadu sei fó sai liu husi kanal RTTL,E.P.

Total eleitór siraiha Timor laran tomak 859.613 ho sentru votasaun hamutuk 1.200 no estasaun votu 1.500.

Jornalista: Carmelita Isaac