CNE Seidauk Simu Keixa Kona-bá Krime Eleitorál

Hatutan.com, (20 Abríl 2022), Díli-Comissão Nacional de Eleições (CNE) to’o oras-ne’e seidauk simu keixa ka reklamasaun ruma husi komunidade ka partidu polítiku no apoiante sira husi kandidatu prezidente repúblika nian na’in-rua kona-bá krime eleitorál iha eleisaun prezidensiál segunda volta, Tersa (19/04/2022).

Lee Mós : Karimbu 2018 La Utiliza Bá Bulletin Votu

Prezidente CNE, José António Belo. Foto/Hatutan.com

“To’o agora, ema ida seidauk keixa, ami seidauk hanoin dehan ida ne’e, ema ameasa. Sé sira ruma koalia ba malu, ne’e buat seluk ida, mais formalmente, ema ida la aprezenta keixa,” Prezidente CNE, José Agostinho Belo informa ba jornalista sira, iha Otél Timor, Kuarta (20/04/2022).

José Belo informa, iha eleisaun prezidensiál  segunda volta ne’e, mosu duni kazu insidente ida iha sentru votasaun Sede Suku Santa Cruz, iha ne’ebé, membru PNTL ida, hosi Unidade Espesiál  Polísia (UEP) nia pistola tarutu derrepente iha sentru votasaun laran. Maibé, prezidente CNE ne’e konsidera katak, kazu insidente ne’e, la’ós hanesan krime boot ne’ebé mak la’ós atu halo ameasa ba ema ruma.

“Ita nia seguransa polísia ninian, nia ba vota hela, depois parese pistola tama hela, ita la espera ida-ne’e tarutu, mais laiha ameasa ruma. Ne’ebé, ema sira labele rona dehan katak, iha rumór, buat sira ne’e hotu,” prezidente CNE ne’e hateten tán.

Tuir José Belo katak, timoroan hotu tenke iha ona hanoin atu hakat ba oin, no presiza aprende situasaun sira iha Áfrika, no iha rai barak tán, Timor-Leste tenke halo di’ak liután ba sira.

Prezensa Eleitór Ladún Iha Korajen

Tuir rezultadu monitorizasaun hosi CNE ba iha eleisaun prezidensiál segunda volta ne’e, haree katak, prezensa eleitór sira ne’ebé mak bá akompaña ka asiste prosesu kontajen vota ladún másimu kompara ho eleisaun primeira volta, 19 Marsu 2022.

Kona-bá partisipasaun eleitór sira nian iha eleisaun ne’e, menus ka aumenta, José Belo dehan, to’o oras ne’e, sira seidauk iha númeru ne’ebé serteza, tanba prosesu apuramentu hosi munisipiu sira balu seidauk konklui, no inklui apuramentu iha CNE rasik mós seidauk.

Jornalista: Rogério Pereira Cárceres