Justisa & Krime
Prizioneiru Ne’ebé Sei Hetan Indultu La To’o Na’in-10
Hatutan.com, (21 Abril 2022), Díli—Ministru Justisa (MJ), Tiago Amaral Sarmento sei submete lista dadur la to’o na’in-10 ba Tribunál Distritál Díli (TDD) no Ministériu Públiku (MP) liu hosi juiz no prokuradór titulár idak-idak hodi fó pareser molok hetan indultu iha loron 20 Maiu tinan ne’e hosi Prezidente Republika (PR).
Populasaun prizionál iha Estabelesimentu Prizionál Becora ho voluntáriu tulun maluk sira ne’ebé presija ran liu hosi oferese ran ba Departamentu Banco de Sangue iha HNGV, 30 Setembru 2021. Foto/dok.João Domingos.
“Ami prosesa ona lista indultu, la to’o na’in-10 tanba haree ba razaun oi-oin liu-liu komportamentu, saúde, kumpri ona pena un tersu no pedidu hosi estabelesimentu prizionál sira liu-liu prienxe rekezitu atu simu indultu ne’e,” Tiago Sarmento hateten ba jornalista sira hafoin enkontru ho reprezentante Vatikanu iha Timor Leste, Mgr. Marco Sprizzi iha Gabinete MJ Colmera, Kinta (21/04/2022).
Lee mós: Xefe Estadu Sei Fó Indultu ba Prizioneiru Na’in 11
Tuir lei indultu númeru 5/2016 kona-bá prosedimentu konsesaun indultu no komutasaun ba pena iha artigu 8 ko’alia kona-bá kondenadu sira iha direitu kada tinan iha loron bo’ot ba indultu, maibé Prezidente Repúblika mak iha kompeténsia atu bele fó.
Iha artigu ne’e la fó fatin ba krime hanesan asosiasaun terorizmu, asosiasaun kriminoza, krime liga ho vida kontra vida ne’ebé pena másimu tinan ualu ba leten.
Maibé, la taka dalan ba krime korupsaun, pekulatu, tráfiku umanu, brankamentu kapitál, korrupsaun pasiva no krime seluk bainhira iha razaun umana.
Alende ne’e, kondenadu ne’ebé atu hetan indultu tenki kompri ona un tersu (1/3) de pena iha estabelesimentu prizionál sira.
Tuir konstituisaun RDTL, artigu 85 hateten Prezidente-Repúblika de’it mak iha kompeténsia hala’o knaar hodi rona tuir Governu, atu fó perdaun ka hamenus kastigu.
Jornalista: Carmelita Isaac