CNE Konklui Apuramentu Nasionál, Ramos-Horta Lidera ho Votu 62,1%

Hatutan.com, (24 Abríl 2022), Díli-Órgaun eleitorál liuhosi Comissão Nacional de Eleições (CNE), Domingu (24/04/2022), tuku 13:35 Otl, konklui ona prosesu apuramentu nasionál bá votu branku, votu abandonadu, votu nulu no votu rejeitadu sira.

Lee Mós : CNE Hahú Apuramentu Nasionál ba Votu Nulu no Reklamasaun

CNE konklui ona apuramentu nasionál, Domingu (24/04/2022), tuku 13:35 Otl. Foto/Hatutan.com

Hosi rezultadu apuramentu nasionál ikus hosi CNE, hatudu katak, kandidatu Prezidente Repúblika (PR), númeru sorteiu 1, José Manuel Ramos-Horta, kontinua lidera ho totál votu 398,028 (62,1%), no kandidatu Prezidente Repúblika  númeru 2, Francisco Guterres “Lú Olo”, ho de’it votu 242,939 (37,9%).

Votu sira ne’ebé durante oras 72, hahú iha Sesta (22/04/2022), tuku 90:00 dadeer liubá, ne’ebé mak CNE halo apuramentu nasionál ne’e, iha votu branku 1643 (0.25%), votu vbandonadu 17 (0.00%), votu vulu 3734 (0.58%) no votu rejeitadu 28 (0.00%).

Tuir lei eleisaun nian, CNE sei fó tan tempu durante oras 24 bá ekipa susesu sira kandidatu Prezidente Repúblika, José Manuel Ramos-Horta ho Francisco Guterres “Lú Olo” nian, atu halo pedidu reklamasaun, rekursu ka kontestasaun ruma, bainhira la satisfás ho rezultadu sira hosi apuramentu ikus ne’e.

Akta ikus liu hosi Diaspora (Portugál, Austrália, Korea Súl, Irlanda Norte, Inglaterra), prienxe direta hosi Prezidente CNE, José Agostinho Belo, hatama bá sistema baze dadus, iha Salaun apuramentu nasionál, CNE, Caicoli, Dili.

Lee Mós : Lú Olo Kongratula Ramos-Horta, Espera Sei Koopera ho Órgaun Soberania Tolu

“Rezultadu hosi apuramentu munisipál ne’e, hosi rai-laran no rai-li’ur nian, iha loron 22 Abríl, ita abertura bá ita-nia apuramentu nasionál. Ita verifika dadus hotu-hotu, liu-liu reklamadu ho votu nulu sira ne’e, ita haree iha kestaun numériku sira ne’ebé ita presiza tenke haree, verifika didi’ak, iha tempu 72 oras, no  Domingu ohin, ami konklui ona rezultadu tomak,” José Agostinho Belo hateten, durante halo enserramentu ba prosesu apuramentu nasionál iha Salaun CNE, Caicoli, Domingu (24/04/2022).

Prezidente CNE ne’e informa, totál votu nulu iha apuramentu ne’e 5000, sira konsege halo kontajen, verifikasaun, iha votu 1200 mak sai válidu, hodi aumenta bá kandidatu na’in-rua nia votu.

Ramos-Horta hetan votu 800-resin no Lú Olo hetan 400-rasin. Votu sira ne’e, bele sente hanesan iha mós ninia signifikante. 

CNE konklui ona apuramentu nasionál, Domingu (24/04/2022), tuku 13:35 Otl. Foto/Hatutan.com

José Belo dehan, maske, rezultadu apuramentu nasionál ne’e termina ona no prienxe hotu ona iha sistema eletróniku, maibé, CNE sei presiza tán oras 72, hodi halo prienximentu bá akta ka elabora bá akta sira, konfirma ho didi’ak, antes fó sai rezultadu provizóriu.

Lee Mós : EUA Kongratula Prezidente Eleitu José Ramos-Horta

Prosesu sira bá elaborasaun akta nian ne’e, sei hahú iha, Segunda (25/04/2022), no bainhira elaborasaun bá akta sira hotu ona, CNE sei fó tempu ba kandidatu PR na’in-rua ninia ekipa susesu sira, ka interesante sira ne’ebé hakarak hato’o mós kontestasaun ka rekursu ruma, sei nakloke hela, durante oras 24 oras tán.

Durante oras 24 ne’e maka laiha ona rekursu ka kontestasaun ruma, CNE liuhosi plenária, sei hato’o diretamente, submete rezultadu ida ne’e bá Tribunál Rekursu (TR), hodi halo análize, estuda akta sira ne’e hotu, rezultadu tomak, sira sei halo validasaun no anúnsiu sai rezultadu durante oras 72 nia laran.

Lee Mós : Embaixadór Sira Husi ASEAN Parabéniza Prezidente Eleitu José Ramos-Horta

Jornalista: Rogério Pereira Cárceres