Hatutan.com (25 Abríl 2022), Díli—Tribunál Distritál Díli (TDD), iha Segunda 25 fulan ne’e, liu hosi leitura sentensa ne’ebé lee hosi juiz Evangelino Belo deside absolve arguidu na’in-14 sen kustu judisiáriu hosi krime omesídiu agravadu no inséndiu relasiona ho akontesimentu iha Ermera iha tinan 2006 hodi sunu uma no oho vítima José Faria Ximenes.
Arguidu na’in 14 mak hanesan Armindo de Jesus Martins, Andre Martins, Gonçalves de Jesus Martins, Moises Martins, David Maia de Deus, Lino de Jesus Lemos, Laurindo Faria, Domingos Ximenes, Francisco Salsinha, Guido Damião de Deus, Samuel Damião de Deus, Fernando Salsinha, Domingos Soares Maia no Ernesto Exposto.
Tribunál esplika razaun absolve arguidu sira hosi krime omesídiu agravadu no inséndiu tanba faktus la sufisiente katak arguidu sira mak involve direta iha kazu oho ema no sunu uma iha Munisípiu Ermera iha tinan 2006.
Bazeia ba deklarasaun sasin sira iha audiénsia katak, arguidu sira involve duni iha grupu artemarsiais hodi asalta vítima no sasin sira nia hela fatin, maibé la haree ho matan katak arguidu sira mak sunu no oho vitima José Faria Ximenes.
Tanba ne’e, Tribunál intende katak faktus iha akuzasaun ne’ebé prodús hosi Ministériu Públiku (MP) liu hosi Prokuradór Rogério Viegas la provadu.
Tanba ne’e Tribunál husu ba Prokuradór atu hatama rekursu bainhira la simu desizaun Tribunál dentru de loron 15.
Antes ne’e, tuir akuzasaun hosi MP katak iha tinan 2006, akontese problema entre grupu arte marsiais PSHT ho Colimau 2000 iha suku Estadu, ne’ebé involve mós suku seluk mak hanesan Suku Riheu no Suku Goulolo ne’ebé pertense ba Postu Administrativu Letefoho no problema hahú bo’ot liu tán kuandu iha loron 12 fulan Agostu tinan 2006, membru arte marsiais hosi grupu PSHT na’in-rua Rosário Maudasi no Constâncio, oho vitima Pedro Mau Meta de Deus hanesan membru COLIMAU 2.000.
Desde ne’e, grupu arte marsiais PSHT komesa halo chekpoint iha estrada públiku no tama bairru-bairru hodi buka membru arte marsiais hosi COLIMAU 2.000 hodi sunu uma no oho.
Tanba ne’e iha loron 19 fulan Setembru tinan 2006, membru grupu arte marsiais hosi PSHT ne’ebé lidera hosi arguidu Armindo de Jesus, Andre Martins no Gonçalves de Jesus Martins, ho ninia membru seluk hanesan arguidu Lito Fátima Ximenes, Laurindo Faria, Alberto Faria, Lino de Jesus Lemos, David Maia de Deus, Moises Martins, Domingos Ximenes, Francisco Salsinha, Guido Damião de Deus, Samuel Damião de Deus, Fernando Salsinha, Domingos Soares Maia no Ernesto Exposto ba sunu vítima José Faria Ximenes, sasin Miguel Salsinha Ximenes no Maria Zélia Faria nia uma, ne’ebé situadu iha Aldeia Culau Haburas, Suku Estadu tanba ne’e, vítima José Faria Ximenes hamutuk ho sasin sira halai subar iha sasin Romaldo de Deus nia uma, iha aldeia Kurasaun de Jesus, Suku Estadu.
Iha loron 02 Outubru tinan 2006 iha tuku 14:00 membru grupu arte marsiais hosi PSHT ne’ebé lidera hosi arguidu Armindo de Jesus, no Andre Martins hamutuk ho ninia membru arguidu na’in-12 kontinua ba halo asaltu hodi lori rama ambon, dima iha vítima José Faria Ximenes nia subar fatin iha sasin Romaldo de Deus nia uma no arguidu Lino de Jesus Ximenes kaer kilat subar iha foho hun, hodi tiru kona iha vítima José nia ibun halo vítima José monu kedan iha fatin.
Tanba ne’e, MP akuza arguidu na’in-14 ho krime omesídiu agravadu no krime inséndiu ne’ebé previstu iha artigu 139 no 263 hosi kódigu penál TL.
Audiénsia julgamentu iha loron 25 fulan ne’e ba kazu ne’e, arguidu sira hetan akompañamentu hosi família no advogadu privadu Câncio Freitas no Manuel Tilman.
Jornalista: Carmelita Isaac
