Saúde
Japaun Oferese Ró Klinika Móvel ba Governu
Hatutan.com, (26 Abríl 2022), Díli—Governu Japaun ho nia fundu investe liu hosi Organizasaun Naun Governamentál (ONG) SHARE atu halo mobilizasaun ba ekipamentu médiku no pesoál saúde sira kobre área Ataúro, ne’ebé oferese Ró Klínika Móvel no simu direta hosi Ministra Saúde Odete Maria Freitas Belo.
Ró Klínika Móvel ne’ebé Governu Japaun oferese ba Governu TL. Foto/Média MS.
Serimónia entrega ne’e hala’o iha edifísiu Unidade Polísia Maritima (UPM), Lecidere, Díli, Segunda 25 Abríl 2022.
Lee Mós: Governu TL Simu tán Vasina Pfizer BioNtech Doze 100.620 Hosi EUA
Ró ne’e sei uza iha Munisípiu Ataúro ne’ebé la asesu ba estrada hanesan iha área Maquili, Berau, Maker, Atekru, Adara, Vatuu no Akrema tanba karreta no motór tama la di’ak.
“Ministériu Saúde iha responsabilidade tomak ba transporte, materiais, ekipamentu ne’ebé mak ohin ita sei halo termu de entrega iha fatin ida-ne’e,” Hatutan.com sita deklarasaun Odete Maria Freitas Belo iha komunikadu.
Ministra ne’e konsidera Munisípiu Ataúro ne’ebé mak foin estabelese Governu labele husik nia mesak, maibé hotu-hotu tau responsabilidade atu tau-matan, la’ós de’it ba ró ida-ne’e, maibé ba serbísu tomak ne’ebé mak hala’o hosi Ataúro.
Odete mós agradese ba Governu Japaun ne’ebé durante tinan 20 iha Timor-Leste nomós NGO-SHARE ne’ebé mak durante ne’e serbísu no koopera di’ak iha área saúde nian.
Partisípa iha serimónia ne’e, Embaixadór Japaun iha Timor-Leste Masami Kinefuchi, Diretór Ezekutivu NGO-SHARE Hideaki Yahiro, Prezidente Autoridade Munisípiu Díli, Guilhermina Filomena Saldanha, Xefí aldeia sira hosi Ataúro no seluk tán.
Jornalista: Rogério Pereira Cárceres