Indultu, TDD Submete Hikas Naran Prizioneiru 17 ba Ministériu Justisa

Hatutan.com (27 Abríl 2022), Díli—Tribunál Distritál Díli (TDD) submete hikas lista kondenadu na’in 17 ba Ministériu Justisa (MJ), hodi enkamiña ba Prezidente Repúblika (PR) hodi deside fó indultu iha 20 Maiu.

Ilustasaun iha Prizaun Laran. Foto/Google

Lista ne’e haruka hikas ba MJ hafoin TDD simu, verfika no rekolla dadus kona-bá kondenadu sira liu-liu informasaun kona-bá desizaun TDD nian ne’ebé hasai ona ba kondenadu.

Lee Mós: Prizioneiru Ne’ebé Sei Hetan Indultu La To’o Na’in-10

“Tribunál iha obrigasaun atu rekolla dadus liga ho kondenadu ne’ebé atu hetan indultu ne’e, liu-liu informasaun kona-bá desizaun ne’ebé TDD hasai ona, liga ho likuidasaun de pena hodi junta ho relatóriu hosi prizaun atu enkamiña uluk ba Ministériu Públiku (MP) durante loron lima. Maibé, remata ona tanba ami intrega ona ba MJ,” Juiz administradór TDD, Afonso Carmona hateten ba jornalista sira iha knaar fatin TDD, Kuarta (27/04/2022).

Tuir lei indultu númeru 5/2016 kona-bá prosedimentu konsesaun indultu no komutasaun ba pena iha artigu 8 ko’alia kona-bá kondenadu sira iha direitu, kada tinan iha loron bo’ot ba indultu maibé Prezidente Repúblika mak iha kompeténsia atu fó.

Maibé, artigu ne’e la fó fatin ba krime hanesan asosiasaun terorizmu, asosiasaun kriminoza, krime liga ho vida kontra vida ne’ebé pena másimu tinan ualu ba leten, no la taka dalan ba krime korrupsaun, pekulatu, tráfiku umanu, brankamentu kapitais, korrupsaun pasiva no krime seluk bainhira iha razaun umanu. 

Alende ne’e, kondenadu ne’ebé atu hetan indultu tenki kompri ona un tersu de pena 1/3.

Tuir konstituisaun RDTL, artigu 85 hateten Prezidente-Repúblika de’it mak iha kompeténsia hala’o knaar hodi rona tuir Governu, atu fó perdaun ka hamenus kastigu.

Jornalista: Carmelita Isaac