Justisa & Krime
Kazu “Kalohan” Kona-bá Produsaun Masin, TDD Hein Desizaun TR
Hatutan.com (27 Abríl 2022), Díli—Tribunál Distritál Díli (TDD) sei hein desizaun hosi Tribunál Rekursu (TR), hodi nomeia hikas juiz prosesu atu substitui juiz Alvaro Freitas tanba iha ligasaun família liga ho krime partisipasaun ekonomia iha negósiu ne’ebé deskonfia involve atuál deputadu Partidu Demokrátiku (PD) António da Conceição “Kalohan” relasiona ho produsaun masin fatuk iha Atabae.
Deputadu Partidu Demokrátiku (PD) António da Conceição “Kalohan”.
Antes ne’e, Juiz Ivan Suritay mak kaer prosesu ne’e, maibé tanba sei tuir formasaun iha Portugál durante fulan neen maka Tribunál deside fali juiz Alvaro Freitas, maibé tanba iha ligasaun família nune’e nia labele kaer prosesu ne’e hodi garante justisa ne’ebé loos.
Lee Mós:PN Hasai Imunidade Deputadu António “Kalohan”
“Prosesu ne’e Tribunál simu ona akuzasaun katak, ne’e tenki liu hosi julgamentu hodi prodús prova, maibé kazu ida ne’e juiz titulár sei iha Portugál tuir formasaun. Bazeia ba Sistema Tribunál, bainhira juiz tuir formasaun mak sempre substitui ho juiz seluk. Tanba ne’e, ami substitui ona ba juiz Alvaro Freitas maibé iha impedimentu tanba iha relasaun familia ho arguido. Nune’e, prosesu ne’e sei la’o iha TR hodi foti desizaun atu nomeia hikas juiz seluk tanba atu garante justisa ne’ebé loos,” Juiz administradór TDD, Afonso Carmona hateten ba jornalista sira iha nia knaar fatin TDD, Kuarta (27/04/2022).
Tanba ne’e, bainhira iha ona desizaun hosi Tribunál Rekursu ba juiz refrere, maka sei marka oráriu julgamentu.
Antes ne’e iha Tersa 26 fulan ne’e, Parlamentu Nasionál (PN) hasai ona imunidade António da Conceição nian, relasiona ho notifikasaun TDD nu’udár arguidu bá iha kazu produsaun masin Atabae, ne’ebé tuir planu Governu hodi halo halo dezenvolvimentu indústria iha Timor-Leste.
Tanba ne’e, sei suspende deputadu ne’e nia servisu, bainhira iha audiénsia julgamentu iha TDD.
Jornalista: Carmelita Isaac