TR Deside Rai Ne’ebé ENSUL MECI Arrenda Husi Governu Pertense Rai Privadu

Hatutan.com, (28 Abríl 2022), Díli- Tribunál Rekursu (TR), foin lalais ne’e, notifika ona Ministériu Justisa, katak arrendamentu rai iha área Colmera ne’ebé empreza internasionál ENSUL MECI arrenda bá Governu ne’e pertense bá privadu timoroan ida nian.

Lee Mós : Governu-ENSUL MECI Sei Formaliza Akordu Arrendamentu Rai ba Konstrusaun DFBC

Konstrusaun Edífisiu DFBC. Foto/DFBC

Arrendamentu bá rai iha área Colmera, Díli, entre Governu no Empreza ENSUL MECI  enfrenta hela difikuldade tamba kazu refere tránzitu em julgadu iha Tribunál Distritál Díli, iha ne’ebé nia rezultadu afavór bá rain nain timoroan ida.

Antes ne’e, iha loron 25 fulan-Marsu 2022, Ministériu Justisa, liu husi Ministru Tiago Amaral Sarmento, halo ona enkontru ho empreza ENSUL MECI atu formaliza akordu no halo konkordánsia hodi halo akordu renovasaun bá arrendamentu tamba durante ne’e iha konstrusaun Dili Financial Business Center (DFBC) ENSUL MECI seidauk selu arrendamentu bá Estadu, tanba bazeia de’it ba akordu investimentu no laiha akordu arrendamentu.

Ho nune’e kualkér investimentu ne’ebé iha tenke iha mós akordu arrendamentu bá rai ne’ebé uza ba investimentu hodi bele garantia ninia investimentu tuir lei bens e moveis.

Iha altura ne’ebá, Prezidente DFBC Alexandre Marques Couto aseita ho pedidu husi MJ hodi formalize kontratu arrendamentu, tanba rekoñese katak durante ne’e la selu arrendamentu ba rai ne’e.

Hafoin iha konkordánsia entre parte Governu no empreza DFBC, iha loron tuir mai, uainhira MJ atu hahú prosesu sira formalizasaun akordu nian simu informasaun katak ENSUL MECI ne’e iha ema ida mak manan kazu ne’e iha Tribunál Rekursu (TR), kazu ne’e tránzitu em julgada no TR nia desizaun dehan katak ENSUL MECI uma ne’e ho rai ne’e ema ida nian no kazu ne’e MJ mós foin horisehik (28/04/2022) tamba ema ne’e haree avizu ne’ebé MJ halo liu husi mídia no nia mai aprezenta katak TR nia desizaun afavór ba nia.

“Ami tenke haree fila fali, estuda fali tan tamba desizaun TR ne’e hanesan lei no boot liu desizaun hotu-hotu ita labele halimar,”  Tiago Amaral Sarmento  hateten.

Governanta ne’e hatutan informasaun kona-bá kazu rai ENSUL MECI ne’ebé tránzitu em julgadu ne’e parte MJ foin mak hatene, nune’e ministériu bolu hela parte sira ne’e mai husu informasaun haree lai desizaun husi Tribunál ne’e oinsá, rai ho uma estadu ka hanusá, luan hira no ida ne’ebé mak pertense ba sira nian tamba ne’e desizaun ida ne’ebé tránzitu em julgadu ona, satan ida ne’e husi TR.

“Desizaun TR ne’e superiór liu no boot liu desizaun hotu-hotu, se mak la kumpre bele iha konsekuénsia legal,” nia dehan.

Konstrusaun edifísiu DFBC ho valór  millaun $30, no daudaun ne’e obra refere  atinje ona 60% ho andár 15.

Jornalista: Vito Salvador