Rejulgamentu, Tribunál Fó Tempu Loron Lima ba Advogadu Aprezenta Paradeiru Emília Pires

Hatutan.com (29 Abríl 2022) Díli—Tribunál Distritál Díli (TDD) iha Sesta 29 fulan ne’e, hala’o rejulgamentu ba krime administrasaun danoza no partisipasaun ekonomia iha negósiu ne’ebé deskonfia involve eis-Ministra Finansa no eis-Vise Ministra Saúde, arguida Emília Pires no Madalena Hanjam relasiona ho projetu fornesimentu kama elétriku ba Ministériu Saúde iha tinan 2016.

Arguida Emília Pires ho Madalena Hanjam. Foto/Repro.

Rejulgamentu ne’e bazeia ba desizaun Tibunál Rekursu (TR) ne’ebé aseita ho rekursu hosi advogadu privadu José Guterres, hodi husu TDD atu halo fali rejulgamentu ba kazu ne’e, atu rekolla hikas provas hotu ne’ebé iha inklui provas ne’ebé la aprovadu no aprovadu iha desizaun TDD iha primeira intánsia.

Tuir ajenda TDD, katak iha loron 29 fulan Abríl tuku 10:00 sei rona arguida sira, maibé Tribunál seidauk bele rona arguida sira tanba arguida Emília Pires la marka prezensa.

Alende ne’e, advogadu privadu husu ba TDD atu arrola hikas sasin ne’ebé antes ne’e presta ona deklarasaun iha julgamentu primeiru.

Bazeia ba razaun hirak ne’e, Tribunál deside hodi fó tempu loron lima ba advogadu hosi Emília Pires hodi aprezenta Emília Pires ninia paradeiru.

Tanba ne’e, Tribunál adi’a hikas julgamentu ba loron seluk hodi rona arguida sira nia deklarasaun.

Antes ne’e, desizaun TDD iha primeira instánsia ne’ebé hala’o iha loron 20 fulan Dezembru 2016, liu hosi juiz kolektivu José Maria de Araújo, Francisca Cabral no Maria Solana deside kondena arguida Emília Pires ho pena prizaun tinan hitu (7) no arguida Madalena Hanjam ho pena prizaun tinan haat (4) no selu kustu judisiál $100 ba kada arguida.

Iha kazu ne’e Ministériu Públiku (MP) akuza arguida na’in-rua ba prátika krime partisipasaun ekonomia iha negósiu no administrasaun danoza ne’ebé previstu iha artigu 299, 274 hosi kódigu penál TL, relasiona ho projetu fornesimentu kama elétriku ba Ministériu Saúde iha tinan 2016.

Audiénsia Julgamentu prezide hosi juis koletivu José Maria de Araújo, Francisca Cabral, Maria Solana, MP reprezenta hosi Prokuradór Rogério Viegas no arguida na’in-rua hetan asisténsia legál hosi Advogadu privadu José Guterres, Pedro Camões.

Jornalista: Carmelita Isaac