Defeza & Seguransa
Forsa Mariña EUA no PNTL Hahú Formasaun Dahuluk Kona-bá Eliminasaun Material Esplozivu
Hatutan.com, (03 Maiu 2022), Díli – Bazeia bá konvite husi Governu Timor-Leste, ekipa ida husi Forsa Mariña Estadu Unidus Amerika (EUA) grupu ida (1) Lojístika nian hahú formasaun ho Polísia Nasionál Timor-Leste (PNTL) kona-bá eliminasaun material esplozivu.
Enkarregadu Negósiu Embaixada EUA, Tom Daley ho Vise-Ministru Interiór, António Armindo akompaña husi Komandante PNTL ho Forsa Mariña EUA nian. Foto/Espesiál
Formasaun durante semana haat ne ‘e sei hasa’ e PNTL nia kapasidade atu elimina ho seguru material esplozivu sira funu nian hodi asegura seguransa no vida timoroan sira-nian.
Komunikadu imprensa husi Embaixada EUA iha Timor-Leste ne’ebé Hatutan.com asesu relata katak formasaun ne’ebé hahú, Tersa (03/05/2022), reprezenta elementu importante husi EUA nia kompromisu bá esforsu PNTL nian atu hadi’ak servisu seguransa bá timoroan sira.
Enkarregadu Negósiu Embaixada EUA, Tom Daley hateten, inisiativa ida-ne’e sei hadi’ak kapasidade PNTL nian, hakle’an parseria EUA ho Timor-Leste no loke oportunidade ekonómika bá timoroan sira, espesialmente ba setór agrikultura atu uza hikas rai sira ne’ebé uluk labele utiliza tanba iha material esplozivu.
Estadu Unidus Amerika kompromete atu apoia Timor-Leste hodi oferese oportunidade bá timoroan sira iha tinan hirak mai.
Ho Apoiu husi Ministériu Defeza EUA nian, Programa Umanitária Kontra Minas fornese apoiu atu dezenvolve kapasidade parseiru polísia lokál sira hodi hala’o detesaun no eliminasaun minas no material esplozivu sira.
Hasai foto hamutuk parte EUA nian ho PNTL. Foto/Espesiál
Programa ida ne’e sei reúne Forsa Mariña EUA no ofisial PNTL sira bá dahuluk hodi tuir formasaun no dezenvolve abilidade bá identifika ameasa, lokalizasaun, avaliasaun no jestaun seguransa. Tékniku sira mós sei halo formasaun kona-bá atendimentu vítima no jestaun apropriadu bá material esplozivu sira.
Estadu Unidus Amerika komprometidu apoia Timor-Leste hodi responde bá ninia prioridade sira seguransa no dezenvolvimentu nian. Apoiu seguransa EUA nian iha Timor-Leste konsentra liu ba reforsu estabilidade, fortalesimentu baze ba governasaun di’ak, asegura kondisaun sira bá dezenvolvimentu ekonómiku, hadi’ak servisu saúde bá timoroan sira no apoiu profesionaliza Polísia Nasionál Timor-Leste.
Jornalista : Elio dos Santos da Costa