Komunikadu Ministériu Finansa nian ne’e relata katak Sekretariadu Tékniku Fundu Covid-19 hahú re-verifika lista pagamentu liña-frente jornalista 2021 hamutuk 410 benefisiáriu ho totál orsamentu $325,950 mil.
Lista ne’e MAPKOMS submete mai Ministériu Finansas iha Sesta-feira, semana kotuk. Nune’e, Sekretariadu Tékniku Fundu Covid-19 presiza halo re-verifikasaun tamba atu garantia katak dadus hirak ne’ebé submete mai Sekretariadu Tékniku Fundu Covid-19 prienxe ona rekizitu legál tuir Dekretu Lei númeru 1/2022, 5 Janeiru kona-bá subsídiu bá profisionál ne’ebé hala’o atividade jornalístika, ne’ebé solisita husi Governu, hodi fornese notísias kona-ba vírus SARS-Cov2 durante Estadu Emerjénsia tinan 2021.
Advertisement
MAPKOMS, Francisco Jerónimo hetan entrevista hosi jornalista sira. Foto/Dok.Hatutan.com
Bainhira Ministru MAPKOMS, Francisco Pereira da Costa Jerónimo, partisipa iha atividade komemorasaun loron mundiál liberdade imprensa ne’ebé Conselho de Imprensa de Timor Leste organiza iha Salaun Delta Nova, Díli, Tersa (03/05/2022), jornalista sira tenta ona konfirma situasaun direitu liña-frente jornalista sira nian ne’e bá Ministru Francisco Pereira da Costa Jerónimo, maibé nia lakohi ko’alia hodi orienta fali jornalista sira atu bele konfirma diretamente ho Ministériu Finansas.
Antes ne’e, iha 28 Marsu 2022, MAPKOMS submete segunda lista jornalista liña-frente 2021 mai Ministériu Finansas ho totál 507 benefisiáriu. Maibé Ministériu Finansas devolve tanba segunda lista ne’e laiha Despaxu Aprovasaun husi Ministru MAPKOMS no benefisiáriu hirak ne’e mós la’ós de’it jornalista, operadór kamera no motorista sira, maibé inklui mós pesoál administrasaun, aprovizionamentu, rekursus umanu no lojístika.
Iha tinan 2020, Sekretariadu Tékniku Fundu Covid-19 mós realiza ona pagamentu suplementu remuneratóriu liña-frente ba jornalista sira ho totál benefisiáriu 216 ho totál orsamentu $97,425 mil ba períodu fulan tolu.
Molok ne’e iha loron 08 fulan-Abríl 2022, Ministériu Finansas mós hasai komunikadu imprensa ida hodi informa bá Jornalista sira relasiona ho atrazus pedidu pagamentu suplementu remuneratóriu liña-frente ba jornalista sira tinan 2021.
Konforme númeru 1 artigu 2, Diploma refere, estabelese katak ba profisionál ne’ebé dezenvolve atividade jornalístika hamutuk ho Sala Situasaun Sentru Integradu Jestaun Krize ka ida ne’ebé Governu husu hodi prodús notísias durante períodu loron 1 fulan-Abríl to’o loron 31 fulan-Dezembru 2021, sei atribui subsídiu pekuniáriu bá kada loron servisu efetivu benefisiáriu nian iha kondisaun direta expozisaun bá vírus SARS-Cov2, durante deklarasaun períodu Estadu Emerjénsia.
Advertisement
Konforme númeru 2 artigu 2, Diploma refere, Subsídiu ne’ebé refere anteriormente iha valor US$5,00 ba kada loron servisu efetivu.
Konforme númeru 3 artigu 2, Diploma refere, subsídiu ida-ne’e bele de’it atribui bainhira iha Despaxu aprovasaun lista ba profisionál sira ne’ebé dezenvolve atividade jornalístika husi Ministru ba Asuntu Parlamentár no Komunikasaun Sosiál (MAPKOMS), ho baze ba informasaun ne’ebé fornese husi Sala Situasaun Sentru Integradu Jestaun Krize ka husi Diresaun Nasionál ba Diseminasaun Informasaun MAPKOMS nian.
Bazeia ba Dekretu Lei númeru 1/2022, 5 fulan-Janeiru ne’e, iha loron 24 fulan-Marsu 2022, MAPKOMS submete pedidu pagamentu mai Sekretariadu Tékniku Fundu Covid-19.
Primeira lista ne’e kompostu husi jornalista husi instituisaun mídia oioin, ho totál 288 benefisiáriu, ne’ebé indika mós fatin ba halo kobertura no primeira lista ne’e hetan aprovasaun husi Ministru ba Asuntu Parlamentár no Komunikasaun Sosiál liuhusi Despaxu númeru 01/MAPCOMS/I/2022.
Maibé, tamba lista ne’e iha duplikasaun no balun konta bankária benefisiáriu la-loos, nune’e Ministériu Finansas devolve filafali ba MAPKOMS hodi hadi’a.
Advertisement
Iha 28 Marsu 2022, MAPKOMS submete filafali lista Jornalista sira mai Ministériu Finansas atu bele prosesa. Iha segunda lista ne’e kompostu husi jornalista husi instituisaun mídia oioin, ho totál 507 benefisiáriu ho totál orsamentu hamutuk $371.400,00.