Defeza & Seguransa
PNTL Identifika Autór Halo Kobransa Ilegál iha Bebonuk
Hatutan.com, (04 Maiu 2022), Díli-Polísia Nasionál Timor-Leste (PNTL), liuhosi Servisu Investigasaun Kriminál Nasionál (SIKN), Tersa (03/05/2022), halo identifikasaun ona bá sidadaun mane ida ho inisiál LM, ne’ebé deskunfia durante ne’e, tama-sai uma komunidade sira nian, hodi halo kobransa osan iha área Bebonuk, Postu Administrativu Dom Aleixo, Munisípiu Díli.
Lee Mós : PNTL Kontinua Menus Rekursu Umanu
Membru PNTL husi Unidade Espesiál Polísia (UEP). Foto/Hatutan.com
Portavós Komandu Jerál PNTL, Superintendente Xefe Armando Monteiro hateten, prosesu atuasaun ida-ne’e akontese, liuhosi ekipa servisu informasaun konjunta PNTL ne’ebé mak vítima balu relata hela.
Kazu ne’e, sei iha prosesu laran, no iha dokumentu mós polísia kolleta tiha ona, no finalidade hosi prosesu ida-ne’e, sei fó sai bá públiku, hodi bele akompaña mós nia prosesu sira.
“Komandu Jerál PNTL liuhosi Servisu Investigasaun Kriminál (SIK) halo identifikasaun ba ita-nia sidadaun balu ne’ebé mak durante ida ne’e halo atividade ida ne’ebé mak ita-nia komunidade barak mak sai vítima, liuhosi kobransa ilegál,” portavós Komandu Jerál PNTL, Superintendente Xefe Armando Monteiro hateten bá jornalista sira, liuhosi konferénsia imprensa iha Kuartél Jerál PNTL, Caicoli, Díli, Kuarta (04/05/2022).
Antes ne’e, komandu PNTL hamutuk ho FALINTIL-Forsa Defeza Timor-Leste (F-FDTL), iha ona kooperasaun no koordenasaun di’ak, oinsá mak atu bele prevene bá aktu sira kona-bá atividade kobransa ilegál.
Aktu sira ne’e, dala-ruma mós lori hotu dignidade instituisaun rua ne’e nia naran, nune’e mós ho lideransa nasionál, ho objetivu atu hetan lukru, nune’e bele fó benefísiu ba sira nia atividade.
“Kazu ida ne’e, agora daudauk, sei kontinua submete hela ba prosesu investigasaun,” komandante Armando Monteiro informa tán.
Portavós komandu PNTL ne’e mós husu ba públiku katak, bainhira rona no haree ema indivíduu ruma mak la’o uza lider nasionál sira nia naran, hodi halo kobransa, atu informa bá autoridade seguransa ho defeza ne’ebé besik, nune’e bele halo atuasaun direta.
Jornalista: Rogério Pereira Cárceres