Hatutan.com (06 Maiu 2021), Díli—Tribunál Distritál Díli (TDD), iha Sesta 06 fulan ne’e, liu hosi alegasaun Ministériu Públiku (MP) ne’ebé reprezenta hosi Prokuradór António Tavares, husu ba Tribunál atu aplika pena prizaun tinan lima ba prezu na’in-ida ho inisiál JB ba krime furtu agravadu tanba foti ona lezada Maria das Dores nia telemóvel rua ho marka oppo A37 no Iphone 7 iha tempu kalan.
Prokuradór António Tavares esplika, razaun husu pena ne’e tanba faktus provadu bazeia ba arguidu nia deklarasaun katak, hafoin foti telemóvel iha viziñu nia uma maka arguidu tama hosi janela foti tán lezada nia telefone rua iha tempu kalan.
Alende ne’e, MP husu Tribunál atu devolve hikas objetu prendidu liu-liu lezada nia telemóvel.
Parte defeza ne’ebé reprezenta hosi Defensór Públiku Joana Cristina, husu ba Tribunál atu absolve nia kliente hosi krime furtu agravadu, tanba arguidu hatudu nia arrependimentu durante julgamentu.
Antes ne’e, tuir akuzasaun hosi MP katak iha loron 07 fulan Setembru 2021 iha tuku 00.30 madrugada, arguidu tama iha lezada nia uma ne’ebé lokaliza iha aldeia Terra Santa, liu hosi janela hodi foti telemóvel rua ne’ebé karrega hela.
Maibé, lezada hakfodak hodi hakilar, halo komunidade iha bairru laran duni arguidu no ikus-mai konsege kaer arguidu no husu telemóvel rua ne’ebé arguidu tau hela iha bolsu.
Tanba ne’e, MP akuza arguidu ba pratika krime furtu agravadu ne’ebé previstu iha artigu 252 hosi Kódigu Penál Timor-Leste.
Audiénsia julgamentu prezide hosi juiz kolektivu Ana Paula, Maria Solana, João Ribeiro, MP reprezenta hosi Prokuradór António Tavares no arguidu hetan asisténsia legál hosi Defensora Públika Joana Cristina.
Jornalista: Carmelita Isaac
