KM Aprova Proposta Lei Opsaun Planu Prinsipál 2023

Hatutan.com, (09 Maiu 2022), Díli—Konsellu Ministru (KM) liu hosi Sorumutu Estraordináriu iha loron 09 fulan-Maiu tinan 2022 aprova ona proposta Lei ida, ne’ebé aprezenta hosi Ministru Finansa (MF), Rui Augusto Gomes, kona-ba Opsaun Prinsipál sira Planu (Grandes Opções do Plano) ba tinan 2023.

Reuniaun Konsellu Ministru (KM), Kuarta (16/03/2022). Foto/KM.

Ezisténsia Lei Opsaun

Prinsipál sira Planu ne’e hanesan ezijénsia ida hosi Lei númeru 2/2022, hosi loron 10 fulan Fevereiru, Lei Enkuadramentu hosi Orsamentu Jerál Estadu (OJE) no jestaun finanseira públika.

“Lei ida-ne’e ho objetivu atu aprova opsaun anuál no plurianuál sira, kona-bá planeamentu ho impaktu iha Orsamentu Jerál Estadu no programasaun orsamentál plurianuál nian, ne’ebé sei permite konkretiza orsamentasaun tuir programa sira tomak,” Hatutan.com sita komunikadu.

Opsaun Prinsipál sira Planu nian (Grandes Opções do Plano) ba tinan 2023 nian ne’e aprezenta, tuir artigu da-47 hosi Lei númeru 2/2022, loron 10 fulan-fevereiru, identifikasaun estratejia orsamentál no opsaun prinsipál sira kona-bá planeamentu ho impaktu iha Orsamentu Jerál Estadu nian ba tinan orsamentál tuirmai no ba tinan haat tutuir malu, programasaun orsamentál plurianuál no analiza ba projesaun sira hosi indikadór prinsipál makroekonómiku nian ho influénsia iha Orsamentu Jerál Estadu no ninia evolusaun.

Proposta Lei ida-ne’e sei submete ba Parlamentu Nasionál

Konsellu Ministru aprova ona mós projetu Dekretu-Lei ida, ne’ebé aprezenta hosi Ministru Administrasaun Estatál, Miguel Pereira de Carvalho, kona- bá programa Uma ba Ema Kbiit Laek Plus (UKL+).

Projetu Dekretu-Lei ida-ne’e hetan ona aprovasaun iha sorumutuk Konsellu Ministrus iha loron 06 fulan-maiu tinan 2022, maibé tanba alterasaun balun mosu iha faze redasaun finál nian, tenke submete fali ba Konsellu Ministrus atu aprova.

Dekretu-Lei ida-ne’e estabelese rejime espesiál aprovizionamentu ne’ebé haree liu ba ezekusaun medida UKL+. Ho rejime foun ida ne’e ba oin sei prevee opsaun rua: ida, ho atribuisaun subvensaun liuhosi estrutura suku PNDS, no ida seluk ho posibilidade atu halo aprovizionamentu sentralizadu, hodi bele hetan ekonomia eskala no poupansa ba rekursu ekonómiku.

Programa ne’e ho objetivu atu hadi’a kondisaun sira abitalidade hosi uma ne’ebé sai nu’udár hela-fatin permanente ba uma-ka’in sira ne’ebé vulnerável liu, bainhira uma sira ne’e aat hela no uma-ka’in sira ne’e la iha uma seluk atu hela ba.

Uma-ka’in ne’ebé vulnerável liu, iha kontestu ezekusaun programa UKL+, maka sira ne’ebé ninia rendimentu médiu loroloron la liu dolar amerikanu 1, 25 (dolar amerikanu ida no sentavu ruanulu resin-lima) no ne’ebé sira-nia uma ne’e aat hela.

Uma-ka’in ne’ebé vulnerável liu, bele benefisia tuir modalidade apoiu sira tuirmai:

1. a) Apoiu finanseiru ba obra benefisiasaun, konservasaun ka reparasaun hosi ninia hela-fatin, to’o valór másimu dolar amerikanu 13000 (dolar amerikanu rihun sanuluresin-tolu);
2. b) Apoiu liuhosi materiál sira konstrusaun nian ba substituisaun materiál sira kobertura no revestimentu hosi ninia hela-fatin, to’o valór másimu dolar amerikanu 4.000 (dolar amerikanu rihun haat).

Jornalista: Rogério Pereira Cárceres