PCIC Detein Ona Autora Ne’ebé Soe Bebé Iha Ai-tarak Laran

Hatutan.com, (09 Maiu 2022), Díli—Polísia Sientífika Investigasaun Kriminál (PCIC), iha Domingu 08 Maiu tuku 15:30 lorokraik, detein ona autora ka inan feton ida ho inisiál MJ (19), ne’ebé deskonfia soe ninia bebé iha lixu fatin, área Ai-tarak Laran, Aldeia Haburas, Suku Motael, Munisípiu Díli.

Bebé ne’ebé ema deskoñesida soe iha lixu fatin área Ai-tarak Laran Aldeia Haburas, Suku Motael, Munisípiu Díli, Domingu 08 Maiu 2022. Foto/Espesiál.

Tuir kronolójia, iha Domingu 08 Maiu 2022, maizumenus tuku 10:25 oras dadeer, komunidade hetan bebé ida ho kondisaun isin mate, ne’ebé ema deskoñesida soe hela iha lixu fatin, iha área Ai-tarak Laran.

Investigadór Xefe iha PCIC, Octavio da Costa Araújo informa, hafoin haree tiha bebé ne’ebé nia isin mate soe hela iha lixu fatin ne’e, iha Domingu 08 Maiu 2022 tuku 10:15,  servisu pikete no prevensaun PCIC nian simu informasaun hosi komunidade katak hetan mate isin ida, Ekipa imediata tun ba iha lokál hodi halo ezame ábitu esterna.

Ezame ábitu ne’e ho objetivu atu identifika sinál sira ne’ebé mak relevante ho mate, ne’ebé mosu iha matebian bebé ninia isin-lolon.

Hafoin konklui ezame ne’e, ekipa PCIC nian transporta kedan bebé ninia mate-isin ba iha Hospitál Nacional Guido Valadares (HNGV), hodi kontinua halo ezame ábitu esterna, ka normalmente ema autópsia.

“Ekipa kontinua kedan, tenta no buka tuir ka lokaliza autór ne’ebé mak soe bebé. Dentru de oras lima nia laran, iha tuku 15:30 horseik, ita lokaliza kedan. Ita identifika kedan autora ne’ebé soe bebé refere, ho inisiál MJ,” Octavio da Costa Araújo hateten ba jornalista sira, liuhosi konferénsia imprénsa, iha knaar fatin, Caicoli, Segunda (09/05/2022).

Autora ne’e timoroan ho idade 19 ne’ebé foin mak mai hosi munisípiu ida no hela iha kapitál Dili, foin fulan rua.

Tanba kondisaun suspeita ninian saúde la permite, tanba foin partu remata, nune’e ekipa transporta kedan autora ne’e ba HNGV, hodi halo tratamentu saúde no hetan observasaun hosi médiku espesialista sira, inklui PCIC rasik.

Investigadór Xefe iha PCIC, Octavio da Costa Araújo.

“Ita suspeita autora ba iha krime refere, matebian bebé nia inan rasik. Autora, ita kaer diretamente iha área Ai-tarak Laran duni. Aumezmu tempu, horsehik kedan ami mós lokaliza bebé nia aman. Entaun, tantu suspeita prinsipál bebé nia inan ne’ebé mak soe bebé ne’e inklui nia aman, iha hotu ona ita nia identifikasaun,” Ocatvio informa tán.

PCIC halo kedan komunikasaun ho Prokuradór Jerál Repúblika (PJR), nu’udár na’in ba asaun penál nian, ne’ebé mak ba iha kazu ida-ne’e, PCIC prezume ba Krime infantesidu, iha artigu 142 hosi Código Processo Penal (CPP).

“Iha prosesu nia laran, agora ita hato’o ona informasaun sira ne’e hotu, pur auto notisia fó krime ba iha Ministériu Públiku, ita hein solisita mandadu. Mate isin agora daudaun iha HNGV hodi hein prosesu autópsia,” subliña.

Atu kombate ema soe bebeik sira ninia bebé iha fatin públiku, PCIC mós iha ona ekipa ida ho naran Brigada ba Prevensaun Kriminál ne’ebé mak durante ne’e sira kontinua sosializa ba públiku, inklui krime hirak ne’ebé sira rejista aas liu, hanesan krime Burla Agravadu ho krime Infantesidu ka krime soe bebé.  

Jornalista: Rogério Pereira Cárceres