Tribunál Julga Autór Sira Loke Jogu Slot Machine Ilegál

Hatutan.com, (12 Maiu 2022), Díli–Tribunál Distritál Díli (TDD), Kinta (12/05/2022), halo kontinuasaun julgamentu bá kazu krime esplorasaun jogu ilísitu no fraude fiskál  ne’ebé envolve husi arguidu na’in-rua ho inisiál BAC no LCX.

Slot machine. Foto/Wikipedia

Presu kazu ho Nuc. 0021/19 PGGCC iha relasaun ho jogu slot machine ne’ebé  loke ilegálmente iha área Audian, Díli husi empreza Tixar Unipesoal Lda ho Happy Royal.

Empreza rua-ne’e la iha lisensa ba atividade jogu “slot machine” maibé hala’o ona sira-nia atividade ilegálmente.

Julgamentu kontinuasaun ne’e, sasin Ajente Xefe Polísia Nasionál Timor-Leste (PNTL), Joaquim da Silva, deklara iha tempu ne’ebá nia maka halo esketsa  bá mákina jogu ne’ebe aprendidu.

Nia deklara mákina ne’ebé utiliza hodi loke jogu slot  machine  ne’e ekipa halo apreensaun iha fatin ida de’it iha kompañia Tixar ne’ebé lokaliza iha Audian ne’ebé na’in maka arguidu LCX.

Antes ne’e, sasin Miguel Lobato deklara bazeia bá dekretu lei númeru 6/2016 kona-bá regra hodi loke jogu slot machine  hateten, primeiru kompañia tenke hato’o proposta liu hosi konkursu ne’ebé loke, maibé ho kritéria emprezáriu tenke iha kapasidade finanseira atinje millaun $10 iha Banku.

Iha tinan 2016 Inspesaun Jogu loke konkursu bá kompañia ne’ebé hakarak loke jogu slot machine no iha konkursu ne’e iha kompañia rua mak prienxe rekizitu tanba iha kapasidade finanseira atinje millaun $10, maibé kompañia ida lakohi, tanba ne’e kompañia Timor Holding Group mak avansa, tanba ne’e Governu atribui ona lisensa no autorizasaun ba kompañia Timor Holding Group no sira seluk seidauk tanba seidauk iha konkursu.

Hafoin rona sasin, juis prezide adia julgamentu bá loron seluk hodi rona alegasaun husi Ministériu Públiku  ne’ebé reprezenta husi Prokuradór Rogério Viegas.

MP ne’ebé reprezenta husi Prokuradór Rogério Viegas  akuza arguidu na’in-rua bá krime esplorasaun jogu ilísitu no fraude fiskál ne’ebé previstu iha artigu 322, 314 hosi kódigu penál Timor Leste, tanba laiha lisensa no autorizasaun bá atividade jogu slot machine.

Audiénsia julgamentu prezide hosi juis singulár Evangelino Belo, MP reprezenta hosi Prokuradór Rogério Viegas no arguidu na’in-rua hetan asisténsia legál hosi Defensór Públiku Juvenál Dias Ximenes.

Jornalista: Carmelita Isaac