Justisa & Krime
Kompañia 81 Seidauk Selu Arrendamentu ba Estadu
Hatutan.com (18 Maiu 2021), Dili—Dadus hosi Ministériu Justisa (MJ) hatudu katak, kompañia internasionál no nasionál hamutuk 81 mak utiliza rai no uma Estadu hodi hala’o atividade ekonómika, maibé la selu arrendamentu ba Estadu.
Rai Estadu balun iha área Bebonuk, Díli, ne’ebé Estadu estabelese kontratu arrendamentu ho empreza balun maibé to’o agora abandonadu. Foto/Hatutan.com
Maski la temi detallada kompañia hirak ne’e, maibé iha kompañia rua mak konsege selu ona dívidas arrendamentu hafoin halo reuniaun ho Ministru Justisa, Tiago Amaral Sarmento.
Lee Mós: Governu Sei Formaliza Arrendamentu Rai no Uma ho EUA
Kontratu arrendamentu ne’ebé estabelese ba arrendatariu sira desde tinan 2022 ladún iha mudansa signifikativu.
Maibé, iha situasaun rua mak akontese, primeiru termu kontratu arredamentu invalidu ona, no arendatáriu kontinua aproveita hodi la halo renovasaun iha Sekretariadu Terras no Propriadade (SETP), segundu arredatáriu balun simu ona karta notifikasaun, maibé la kumpri.
Tanba ne’e atu regulariza situasaun hirak ne’e, Ministru Justisa Tiago Amaral Sarmento hatun ona despaiixu ho númeiru 31/2022 iha loron 13 fulan ne’e hodi fo órden ba inspetór Gabinete Ispesaun Auditória (GIA), hodi halo identifikasaun, inspesaun, kontrolu ba kontratu arrendamentu ba utilizasaun rai no uma Estadu iha kapitál Díli.
“Inspesaun ida ne’e halo atu regulariza arendatáriu ne’ebé mak seidauk selu arrendamentu ba Estadu tuir kontratu ne’ebé estabelese ona, atu sira bele kumpri obrigasaun. Tanba ne’e, GIA sei halo inspesaun bazeia mós ba dekretu lei númeiru 19/2004 loron 29 fulan Dezembru kona-bá rejimi jurídiku bens imóveis no afestasaun ofisiál inklui arrendamentu bens imóveis dominu privadu do Estadu,” Inspetór GIA Lucas António da Costa hateten liu hosi Konferénsia Imprensa ne’ebé hala’o iha MJ, Caicoli, Tersa (17/05/2022).
Ekipa sei foti dadus hosi arrendatáriu sira ne’ebé la selu arrendamentu ba Estadu no liu hosi informasaun ne’ebé ekipa hetan sei hato’o liu hosi relatóriu ba MJ hodi foti medida no asaun ba melloramentu.
Jornalista: Carmelita Isaac