Polítika
Papa Francisco Hato’o Parabens ba Prezidente Eleitu no Povu TL
Hatutan.com, (18 Maiu 2022), Díli—Papa Francisco kongratula no hato’o felisitasaun ba Prezidente eleitu ba períudu 2022-2027, José Manuel Ramos-Horta no povu Timor-Leste (TL) ne’ebé sei selebra loron restaurasaun independénsia iha 20 Maiu tinan ne’e.
Mgr. Marco Sprizzi.
Felisitasaun ne’e hato’o hosi reprezentante Vatikanu iha Timor Leste, Mgr. Marco Sprizzi, bainhira partisipa missa agradesimentu selebrasaun tinan 20 restaurasaun Independénsia iha Igreja Parókia Katedrál, Vila verde Díli.
Lee Mós: Tribunál Rekursu Proklama Ramos-Horta Eleitu ba Prezidente Repúblika 2022-2027
Mgr. Marco Sprizzi iha nia diskursu hateten, Santo Padre, Papa Francisco hato’o nia parabens ba Prezidente eleitu no povu Timor Leste ne’ebé selebra dadaun tinan 20 restaurasaun Independénsia.
Papa Frencisco hato’o parabéns ba nasaun TL, ba Estadu no sidadaun tomak ba êzitu demokrátiku, pasífiku no ba maturidade Estadu ida-ne’e.
Papa Francisco akompaña besik tebes situasaun Timor-Leste nian maski nia vizita mai TL seidauk bele realiza.
“Santo Padre sente kontente ho maturidade demokrátik ba pas ne’ebe Timor Leste manifesta ba mundu tomak,” Marco Sprizzi hateten.
Tinan 20 restauransaun independénsia lori lisaun barak ba Timoroan sira, atu iha unidade, amizade no fraternidade tanba Timor Leste hanesan nasaun ne’ebé restaura nia independénsia ho roman pas nian no rekonsiliasaun.
Jornalista: Vito Salvadór