Tinan 18 Ezisténsia, PDHJ Kontinua Enfrenta Dezafiu iha Prosesu Investigasaun

Hatutan.com (26 Maiu 2022), Díli—Ezisténsia Provedoria Direitus Humanus e Justisa (PDHJ) durante tinan 18 nia laran kontinua enfrenta dezafiu barak iha prosesu investigasaun liu-liu bainhira halo atendimentu investigasaun ba kazu ruma liga ho violasaun direitus humanus no boa Governasaun.

Prezidente Repúblika, José Manuel Ramos-Horta partisipa iha komemorasaun aniversáriu PDHJ ba dala-18 iha Salaun CNE Caicoli, Kinta (26/05/2022). Foto/Média PR.

Difikuldade hirak ne’e mak hanesan, difisil ba PDHJ atu hetan dokumentu no informasaun kona-bá violasaun ne’ebé akontese.

Lee Mós: PDHJ Detekta Kandidatu Sira Komete Irregularidade Sia

Tanba ne’e atu solusiona difikuldade hirak ne’e maka PDHJ submete ona proposta revizaun estatutu PDHJ nú 7/2004 ba Parlamentu Nasionál (PN) hodi halo armonizasaun ba artigu balun.

“Proposta ne’e ho konteúdu halo armonizasaun ba artigu balun inklui infrasaun iha ámbitu administrativu, nune’e bele halo separasaun klara kona-bá krimi no mós kazu sivil no halo mós introdusaun ba estatutu espesiál funsionariu PDHJ, hodi garantia independénsia hodi eleva dezempeñu funsaun hosi funsionáriu nian,” Provedora, Jesuinha Maria Ferreira Gomes hateten ba jornalista sira, hafoin komemora loron aniversáriu PDHJ ba dala 18 iha salaun CNE, Kinta (26/05/2022).

Alende ne’e, iha mós esforsu seluk liu hosi dalan haforsa koordenasaun institusionál inklui estabelese sorumutu nível aas hodi asegura kooperasaun servisu hamutuk entre instituisaun relevante sira.

Entertantu progresu servisu PDHJ durante ezisténsia tinan 18 nia laran hahú tinan 2005-2021 simu keixa hamutuk 3.553, feto 609, mane 2.618 inklui keixa anónimu hamutuk 66.

Keixa ho alegasaun ba violasaun direitus umanus hamutuk 1.432, keixa ba violasaun prinsipiu Governasaun 1.085 inklui keixa ne’ebé relasiona ho alegasaun korrupsaun 95.

Hosi númeru refere, konsege loke investigasaun ba kazu hamutuk 1.546, kompostu hosi violasaun direitus umanus 738, boa Governasaun 719 no kazu korrupsaun 89, maibé iha 102 kazu mak konsege halo mediasaun kompostu hosi violasaun direitus humanus 42 no boa Governasaun 58.

Jornalista: Carmelita Isaac