DGGPE Seidauk iha Jestaun Di’ak Kontrolu Patrimóniu Estadu

Hatutan.com, (27 Maiu 2022), Díli-Diresaun Jerál Jestaun Patrimóniu Estadu (DGGPE, sigla portugél) seidauk iha jestaun di’ak kontrolu patrimóniu Estadu (Karreta ho motór Estadu) ne’ebé estasiona iha arredores edifísiu DGGPE nian iha Balide, Díli.

Lee Mós : Ekipa Konjunta Prende Karreta Estadu Ida Transporta Oan Bá Eskola

Karreta Estadu ne’ebé DGGPE rekollah husi ministeriu sira no estasiona iha Edifisiu DGGPE, Balide, Díli. Foto/Hatutan.com

Baze bá orientasaun husi rezolusaun Governu númeru 130/2021 de 29 de Setembru kona-bá jestaun no realokasaun  veíkulu Estadu no  Patrimóniu Estadu fó kompeténsia bá DGGPE atu rekolla karreta Estadu hotu bá estasiona iha DGGPE, maibé realidade hatudu sidauk seidauk iha jestaun kontrolu ne’ebé di’ak bá patrimóniu Estadu sira-ne’e.

Tuir observasaun hosi Komisaun Anti-Korrupsaun (CAC, sigla portugés) durante implementasaun jestaun frota tuir Rezolusaun Governu númeru 130/2021, hatudu katak intensaun husi rezolusaun Governu ne’e atu redús despeza Estadu bá gastu ne’ebé liga ho manutensaun no kombustivel.

“Intensaun husi rezolusaun ne’e atu dehan katak redús despeza Estadu bá gastu ne’ebé liga ho manutensaun no kombustivel, maibé depois DGGPE foti tiha patrimóniu Estadu hirak ne’e,  DGGPE la halo jestaun ho di’ak, maibé ne’e kabe bá DGGPE nia responsabilidade,” Adjuntu Komisáriu CAC bá asuntu Sensibilizasaun no Prevensaun, Luis Oliveira Sampaio, haktuir hodi responde Hatutan.com, Sesta (27/05/2022).

Kona-bá instituisaun Governu ne’ebé seidauk koopera hodi implementa Rezolusaun Governu ne’e hodi kontribui entrega karreta Estadu bá DGGPE, Luis Sampaio hateten, tuir loloos instituisaun Governu ne’ebé sai hanesan servidór Estadu iha devér atu kumpre no sai servidór bá interese públiku tanba rezolusaun ne’e la’ós mai husi DGGPE maibé liu husi Konsellu Ministru tanba ne’e ministériu hotu, inklui instituisaun Estadu sira ho natureza administrasaun indireta  iha devér atu kumpre.

Karreta Estadu Estasional iha edifisiu DGGPE, Balide, Díli. Foto/Hatutan.com

“Laiha fatin bá kualkér instituisaun atu privatiza patrimóniu Estadu, tantu parte Eletrisidade Timor Leste, empreza Publika (EDTL,E.P) no sira seluk ne’ebé sei kontinua utiliza karreta Estadu ho xapa matrikula privadu,” Luis Sampaio afirma tan.

Durante ne’e CAC halo ona atuasaun ba servidór Estadu ne’ebé privatiza patrimóniu Estadu bá interese pesoál, maske balun seidauk maibé kontinua koordena ho diresaun relevante nune’e ema hotu bele kumpre devér tuir rezolusaun Governu.

“Bainhira tama ona ba kestaun kriminál maka tenke prosesa ba Ministériu Públiku (MP),” Adjuntu Komisáriu CAC ne’e afirma tan.

Liga ho servisu DGGPE kona-bá jestaun bá patrimóniu Estadu ne’ebé estasiona iha resintu edifísiu DGGPE nian ne’e, Hatutan.com tenta halo konfirmasaun ho Diretór Jerál DGGPE iha oras tuku 10:00, maibé okupadu  hela ho enkontru no husu jornalista atu halo entrevista hamutuk ho mídia RTTL no GMNTV.

Lee Mós : EDTL,E.P Uza Patrimóniu Estadu La ho Xapa Matrikula G

Jornalista: Carmelita Isaac