PM Taur Agradese Apoiu Ne’ebé Durante Ne’e Xina Oferese ba TL

Hatutan.com (04 Juñu 2022), Díli—Primeiru-Ministru (PM) Taur Matan Ruak, simu vizita ofisiál hosi Konselleiru Estadu no Ministru Negósius Estranjeirus hosi Repúblika Popular Xina, Wang Yi, hodi buka hametin liután relasaun bilaterál País rua nian iha últimu tinan 20 ne’e.

Primeiru-Ministru (PM) Taur Matan Ruak, simu vizita ofisiál hosi Konselleiru Estadu no Ministru Negósius Estranjeirus hosi Repúblika Popular Xina, Wang Yi, iha Palásiu Governu, Sesta (04/06/2022). Foto/Média PM.

Iha enkontru ne’ebé nakonu ho amizade ne’e, Xefe Governu Timor-Leste, liuhosi Ministru Negosius Estranjeirus, Wang Yi, agradese tebes ba Governu Xinéza nian ba apoiu hotu-hotu durante tinan 20 ikus ne’e.

Lee Mós: Reuniaun KM Delibera no Fó Podér ba Ministru Na’in-Haat Asina Akordu ho Xina

“Agradese espesiál mós ba apoiu medikamentu no ekipamentu protesaun nian iha mitigasaun no prevensaun COVID-19 nian durante períodu pandemia,” Hatutan.com sita komunikadu ne’ebé fó-sai hosi Gabinete Primeiru Ministru, Sesta (03/06/2022).   

Parte rua konkorda katak, sei hametin liután lasu amizade ne’ebé la’o ona durante ne’e hodi respeita nafatin prinsípiu sira Estadu ida-idak nian.

Iha okaziaun enkontru ne’e, Xefe Governu Timor-Leste no MNE Wang Yi loke simbolikamente plaka komemorativu tinan 20 estabelesimentu relasaun diplomátika entre Timor-Leste no Xina.

Primeiru-Ministru (PM) Taur Matan Ruak, simu vizita ofisiál hosi Konselleiru Estadu no Ministru Negósius Estranjeirus hosi Repúblika Popular Xina, Wang Yi, iha Palásiu Governu, Sesta (04/06/2022). Foto/Média PM.

Durante Estadia oras 24 iha Díli, Ministru Negósius Estranjeirus, Wang Yi sei hala’o enkontru bilaterál ho nia omóloga Timorense, Adaljiza Magno hodi fó sasin ba asinatura akordu entre Governu Repúblika Demokrátika Timor-Leste no Governu Repúblika Populár Xina iha área sira hanesan; Kooperasaun Ekonómika no Téknika, Área Saúde, Administrasaun Rádiu no Televizaun Nasionál (RTTL) no akordu kontinuasaun prosesu dijitalizasaun RTTL no projetu televizaun dijitál terrestre.

Akompaña Xefe Governu Timorense iha enkontru ne’e mak hanesan, Ministra Negósiu Estranjeiru no Kooperasaun, Adaljiza Magno, Ministru Prezidénsia Konsellu Ministru, Fidélis Magalhães, Embaixadór Timor-Leste ba Xina, Abrão dos Santos, Diretór Jerál Asuntu Bilaterál, Domingos Sávio, Xefe Gabinete Primeiru-Ministru, Azevedo Lourenço da Costa Marçal no seluk tán.

Enkuantu akompaña Ministru Negósiu Estranjeiru, Wang Yi, mak hanesan, Embaixadór Xina iha Díli, Xiao Jiangou, Vise-Ministru Negósiu Estranjeiru, Xie Feng, Ministru Adjuntu, Ministériu Komérsiu, Guo Tingting, Vise-Diretór Ajénsia Kooperasaun Internasionál ba Dezenvolvimentu Xina, Zhao Fengtao, Sekretáriu Konselleiru Estadu no Ministru Negósiu Estranjeiru nian, He Wei, Vise-Diretór Jerál  Departamentu ba Asuntu Norte Amerikanu no Oseánia-MNE, Yao Wen, no Vise-Diretór Jerál Departamentu Informasaun MNE, Jiang Xiaoyan.

Jornalista: Rogério Pereira Cárceres