UPF Presiza-tán Membru Atu Reforsa Seguransa Iha Fronteira

Hatutan.com, (06 Juñu 2022), Díli—Polísia Nasionál Timor-Leste (PNTL), Unidade Patrallamentu Fronteira (UPF), daudaun ne’e enfrenta problema kona-bá rekursu umanu, tanba membru sira ne’ebé oras-ne’e destaka hodi asegura lutu fronteira terrestre sei limitadu.

F-FDTL dan UPF mengelar patrolik di wilayah perbatasan darat TL-RI. Foto/kontribusi Eugénio Pereira

“Realmente la sufisiente hodi garante seguransa iha liña fronteira ne’ebé mak ho ninia lu’an 272,8 km. Tanba ne’e maka rekusu umanu mós sai hanesan matéria ida ne’ebé daudaun ne’e, liuhosi semináriu ne’e diskute, atu bele fó ideia ba malu, nune’e ita bele garante di’ak liután fronteira,” Komandante UPF, Superintendente Polisia, Euclides Belo hateten ba jornalista sira, iha Suai Room, Timor Plaza, Segunda, (06/06/2022).

Lee Mós:UPF dan TNI Perkuat Hubungan Harmonis di Tapal Batas

Euclides Belo dehan nia laiha kompeténsia kona-bá rekrutamentu tanba desizaun iha nível altu no nível politiku sira nian.

Maski nune’e, hanesan komandante UPF sei kontinua esforsu hodi jere rekursu mínimu ne’ebé mak iha, atu bele fó seguransa nafatin ba povu TL, iha fronteira terreste.

“Hanesan komandante UPF, maski rekursu mínimu, liuhosi autoridade lokál, hanesan xefe suku, aldeia, administradór munisipiu sira, Prezidente autoridade Munisipiu sira, lia-na’in sira, veteranu, kolega foinsa’e sira, ne’ebé mak fó apoiu no espalla informasaun ida ne’ebé mak pozitivu kona-bá fronteira nian, ha’u apresia ba sira nia kontribuisaun, durante tinan-ida hamutuk ho sira iha ne’ebá,” komandante Euclides Belo, apresia.

Prezensa Superintendente Polisia, Euclides Belo nian, nu’udár komandante UPF iha lutu fronteira ne’e, ho moto, “Servisu Hamutuk Grante Liña Fronteira Sai Fatin Seguru ba Ema Hotu”.

Presiza Tán Kareta Operasionál

Komandante UPF, Superintendente Polisia, Euclides da Costa Belo.

Alende hasoru problema kona-bá menus rekursu umanu, komandante Euclides Belo informa mós katak, problema seluk tán ne’ebé sira hasoru maka, fasilidade komunikasaun hanesan rádiu no presiza sosa tán karreta operasionál ba membru UPF sira.

“Transporte mesak hosi 2015 to’o mai agora, barak maka presiza atu halo manutensaun no ideal liu maka tenke iha transporte foun, atu bele garante seguransa,” Euclides Belo hateten.

Hatán ba preukopasaun sira ne’e, Vise Ministru Interiór (VMI), António Armindo, rekoñese katak seguransa iha área fronteira ne’e iha limitasaun barak mak membru sira hasoru mak hanesan limitasaun ba ekipamentu, kondisaun hela fatin, limitasaun kona-bá númeru hosi membru UPF ne’ebé oras-ne’e sei limitadu. Maibé, polítika governu nian maka hakarak atu responde ba problema sira ne’e.

“Politika governu nian maka, hahú hadi’a ida-ne’e. Hahú hadi’a sira nia infaestrutura, bem estár, hahú hadi’a sira nia ekipamentu, tenke hanoin mós atu hadi’a kona-bá númeru sira ne’ebé maka haree iha limitasaun,” António Armindo hateten.

Iha tinan kotuk, governu liuhosi Ministériu Interior, hahú uluk ona hadi’a bem estár membru sira nian. Hasa’e alimentasaun $10 kada loron, saláriu ba 20% no tinan 2023 sei aumentan tán 15% hodi kompleta 20% no depois sei iha tán benefísiu sira seluk.

Tuir fali maka membru UPF sira nia infra-estrutura ne’ebé mak iha tinan ne’e, governu halo tán ona Postu Seguransa hamutuk 25 ba unidade fronteira terrestre no sei tenta hodi aumenta tán postu foun iha fatin sira seluk.

Kona-bá ekipamentu ho rekrutamentu, António Armindo dehan ida-ne’e parte ida ne’ebé mak krusiál loos.

“Iha fronteira, hanesan ita hatene, númeru ne’e ki’ik. Tanba ida ne’e maka ha’u hamutuk ho komandante jerál na’in-rua, komandante administrasaun, ami halo ona planu rekrutamentu, bazeia ba orientasaun verbál hosi Primeiru Ministru hanesan Ministru Interior ne’ebé haruka ona ba nia gabinete. Maibé, ami seidauk simu resposta. Mais depois kuandu simu nia resposta mak ita foin haree,” António Armindo, hateten.

Tuir António Armindo katak, ho konstrusaun foun tán ba postu hamutuk 25 ne’e presiza duni atu aumenta tán kuantidade membru PNTL liu-liu ba UPF iha liña fronteira, liuhosi rekrutamentu foun.

Oras ne’e daudaun membru UPF hamutuk 400-resin.

Jornalista: Rogério Pereira Cárceres