MS-MSSI Sei Asegura Implementasaun Programa “Bolsa da Mãe” Jerasaun Foun

Hatutan.com, (07 Juñu 2022), Díli—Ministériu Saúde (MS) ho Ministériu Solidariedade Sosiál no Inkluzaun (MSSI) sei asegura Implementasaun Programa “Bolsa da Mãe” Jerasaun foun.

Ministériu Saúde (MS) ho Ministériu Solidariedade Sosiál no Inkluzaun (MSSI) sei asegura Implementasaun Programa “Bolsa da Mãe” Jerasaun foun, liu husi hosi asina akordu Diploma Ministeriál Konjunta, ne’ebé realiza iha Edifísiu MSSI, Caicoli Díli, Tersa (07/06/2022). Foto/MSSI.

Kompromisu atu asegura programa ne’e liu hosi asina akordu Diploma Ministeriál Konjunta entre ministériu  rua nian, ne’ebé realiza iha Edifísiu MSSI, Caicoli Díli, Tersa (07/06/2022).

Lee Mós: Austrália Prioritiza Apoiu iha Programa Bolsa da Mãe Jerasaun Foun

“Asina Diploma Ministeriál konjunta ne’e ho objetivu atu asegura programa ne’e ninia implementasaun, ministériu bele hatene ninia kna’ar,”Hatutan.com sita deklarasaun Vise-Primeira Ministra no Ministra Solidariedade Sosiál no Inkluzaun, Armanda Berta dos Santos iha komunikadu.

Asinatura Diploma Ministeriál konjunta projetu Bolsa da Mãe Jerasaun Foun ba Munisípiu tolu (3), hanesan Bobonaro, Ainaro no Rejiaun Administrativa Espesiál Oecusse Ambeno (RAEOA) ne’ebé sei implementa uluk programa ne’e.

Implementasaun projetu ne’e sei halo abertura iha loron 17 fulan Juñu no hahú rejistu kedan durante fulan ida hafoin halo pagamentu ba benefisáriu inan isin-rua.

Inan isin-rua kada fulan sei hetan $15 durante fulan sia nia laran no bainhira bebé moris ona, hahú hosi seidauk tinan ida to’o tinan neen, kada fulan sei hetan $20 no bebé moris ho kondisaun normál sei simu $20, maibé bainhira moris ho kondisaun defisiente sei simu $30 kada fulan.

Programa ida-ne’e sei implementa uluk iha munisípiu tolu (3) no bainhira susesu mak foin kontinua implementa mós iha munisípiu seluk, bazeia ba orsamentu ba projetu Bolsa da Mãe Jerasaun Foun ne’ebé hetan apoiu hosi Governu Austrália.

Jornalista: Rogério Pereira Cárceres