Justisa & Krime
Konsellu Ministru Aprova Dekretu Lei Informasaun Kadastrál Prediál
Hatutan.com, (08 Juñu 2022), Díli— Ministru Justisa, Tiago Amaral Sarmento aprezenta ona “Proposta dekretu-Lei Informasaun Kadastral Predial” iha Konsellu Ministru (KM) hodi husu aprovasaun.
Reuniaun Konsellu Ministru (KM). Foto/Média MOP.
Liu hosi deliberasaun Konsellu Ministru, governu aprova ona dekretu Lei ne’e, nune’e bele fó biban Ministériu Justisa hodi bele hahú halo implementasaun ba lei rai númeru 13/2017 no prosesu distribuisaun “sertidaun titlu nain ba rai” ba sidadaun sira ne’ebé, sira nia parselas rai rejistradu ona no laiha disputa ruma.
Lee Mós: Tinan 20 Ukun-Án, Seidauk Iha Lei Própriu Bá Atribuisaun Sertifikadu Rai
“Dekretu lei ida-ne’e atu regula kona-ba, ezekusaun, konservasaun, atualizasaun no asesu bá informasaun kadastral nian,” Hatutan.com sita komunikadu.
Informasaun hosi kadastru ne’e kona-bá diskrisaun no kompozisaun fíziku kada prédiu, indikasaun naran nomós identidade titulár hosi propriedade refere.
𝐓𝐢𝐩𝐮 𝐛𝐚 𝐥𝐞𝐯𝐚𝐧𝐭𝐚𝐦𝐞𝐧𝐭u 𝐤𝐚𝐝𝐚𝐬𝐭𝐫𝐚𝐥 𝐢𝐡𝐚 tolu:
- Levantamentu kadastral sistemátiku katak prosesu levantamentu ida ne’ebé planeadu, iha área ne’ebé defini antes ona, la’o tuir tempu planeadu no gratuitu.
- Levantamentu kadastral Esporádiku, katak levantamentu ida ne’ebé Estadu halo bazeia bá pedidu hosi interessante sira. Bá levantamentu esporádiku sei kobra ou selu emolumentus.
- Levantamentu kadastral Diferidu, katak levantamentu ida halo tanba dadus hosi levantamentu ida uluk hatudu katak sei iha problema ka disputa ruma.
Ho aprovasaun Dekretu Lei ida ne’e, hanesan pasu importante ida bá implementa lei rai no.13/2017. Tamba ho diploma kadastru nian, maka sei iha informasoens kona-bá imóvel ida.
Nune’e bele atribui direitu ba ema ida nu’udár na’in ba imóvel refere, depois mak lori bá rejistu iha predial, atu nune’e iha serteza legál.
Tuir lei ida ne’e mós, fó kompetênsia bá Ministériu Justisa, liu hosi Diresaun Jerál Terras no Propriedades atu halo servisu kadastral nian.
Ho aprovasaun dekretu-lei ne’e, tempu badak Governu sei submete ba Prezidensia Repúblika, hodi hetan promulgasaun hosi Prezidente Repúblika no Ministru Justisa Tiago Amaral Sarmento espera katak laiha objesaun hosi Prezidente Repúblika José Manuel Ramos Horta.
Jornalista: Vito Salvadór