Defeza & Seguransa
UPF Detein Sidadaun Ida Halo Transaksaun Mina-tein Ilegál
Hatutan.com, (08 Juñu 2022), Díli— Unidade Patrulamentu Fronteira (UPF) halo apreensaun ba mina tein nian kaixa 25 no halo detensaun ba sasan na’in, hodi submete ba prosesu investigasaun.
UPF halo apreensaun iha Tersa kalan tuku 23:00, iha postu Memo munisipiu Bobonaro bainhira kompañia Alfa halo operasaun, pasa revista no kontrola ema ho sasan ne’ebé mak deskonfia bele ultrapasa tanba distánsia hosi postu ida ba postu seluk lu’an teb-tebes.
Lee Mós: Manu Bangkok 12 ho Kilat-manu 17 Tama Ilegál Husi Fronteira
“Komandante Kompañia no Seksaun husu ona orientasaun, ha’u hanesan Komandante UPF orienta ona atu halo koordenasaun ho Seksaun Investigasaun Komandu PNTL munisipiu Bobonaro no koordena ho Diresaun Alfandega, Kuarentena no parte relevante hodi halo prosesu tuir lei,” Hatutan.com sita deklarasaun Komandante UPF Superintendente Euclides Belo iha komunikadu, Tersa (07/06).
Sasan evidénsia no nia na’in oras-ne’e daudaun sei iha hela prosesu, hodi halo identifikasaun no sei haree mós mina iha kaixa laran ne’e hodi komprova mina tein duni ka materiál seluk, nune’e sei haree hafoin kanaliza ba Komandu PNTL munisípiu Bobonaro.
“Ita iha kanal no lei atu jere objetu hirak ne’ebé mak ita halo apreensaun ho nia na’in tanba liu hosi illegal. Nune’e ita prosesa. Espera orsida sei halo relatóriu no sei iha sidadaun balun ne’ebé mak ita suspeta tán ba servisu transaksaun ilegál hirak ne’e mak ita sei halo prosesu tuir prosedimentu legál ne’ebé mak iha,” Komandante Belo esplika.
UPF nafatin promove no konsidera direitu sidadaun sira nian atu enkamiña lamentasaun hosi sidadaun ne’ebé mak kapturadu.
Atividade ne’ebe mak sira halo mós UPF konsidera nafatin maski illegal, maibé UPF halo mós rekomendasaun ba parte relevante atu bele defini hodi kontinua loke merkadu móvel, nune’e sidadaun sira ne’ebe hela iha fronteira bele halo kompras no tuir distánsia ne’ebé maka sira iha.
UPF halo koordenasaun hotu-hotu atu bele fó satisfasaun ba komunidade no la kondena sira tuir UPF nia gostu maibé tuir lei ne’ebé vigora.
Jornalista: Rogério Pereira Cárceres