Governu TL Atribui Direitu Konsensaun Rai ba FFTL Atu Padroniza Estádiu Futeból

Hatutan.com (13 Juñu 2022), Díli—Governu Timor Leste (TL) liu husi Ministériu Justisa (MJ) atribui direitu konsensaun rai hodi padroniza estádiu futeból tuan, inklui rai ne’ebé lokaliza iha kampu demokrasia ba Federasaun Futeból Timor-Leste (FFTL) hodi halo dezenvolvimentu iha área futeból.

Ministru Justisa (MJ), Tiago Amaral Sarmento entrega dokumentu ba rai ba Reprezentante FIFA atu padroniza estádiu futeból tuan, inklui rai ne’ebé lokaliza iha kampu demokrasia ba Federasaun Futeból Timor-Leste (FFTL) hodi halo dezenvolvimentu iha área futeból, iha knaar fatin, Colmera, Segunda (13/06/2022). Foto/Hatutan.com.

Objetivu hosi atribuisaun ne’e, hodi apoia FFTL liu hosi Federation of International Football Association  (FIFA) ne’ebé sei halo padronizasaun ka estandarizaun ba estádiu futeból tuan ne’ebé sei finansia no responsabiliza 100% hosi FIFA.

Lee Mós: Ramos-Horta Konsidera Vizita Trofeu Kopa Mundiál Nu’udár Diplomasia Bá Pás

“Primeiru MJ atribui fatin ida iha kampu demokrasia ba FFTL no SEJD hodi dezenvolve kampu foteból. Segundu kampu estádiu 100% FIFA mak sei dezenvolve ho sira nia orsamentu rasik tanba ne’e MJ halo fali kontratu arrendamentu ho FFTL durante tinan 45. Tanba ne’e, ho prezensa FIFA no kampu ne’ebé sira sei halo bele dada besik liután jogus internasional mai TL. Tanba, FIFA mós kompremetidu katak kampu ne’e sira maka sei halo tuir padraun internasionál,” Ministru Justisa (MJ), Tiago Amaral Sarmento hateten enkontru ho SEKOMS, SEJD no FIFA iha ninia knaar fatin, Colmera, Segunda (13/06/2022).

Kona-bá valór arrendamentu, Governante ne’e hateten sei hein relatóriu levantamentu dadus hosi Diresaun Terras no Propriedade, maibé sei tau mós iha kontratu nia laran. 

Estádiu ne’ebé daudaun iha, FIFA sei sobu atu halo tuir padraun internasionál bazeia ba esperiénsia ne’ebé halo ona iha nasaun seluk, maibé depende ba sira nia tékniku.

Iha sorin seluk, Prezidenti FFTL Francisco Martins da Costa Pereira Jerónimo hateten loloos estádiu ne’e hahú halo ona, maibé sira sei prepara dokumentus hodi submete ba FIFA iha loron 04, nune’e bele loke tenderizasaun internasionál no FIFA mak sei responsabiliza 100% hahú hosi tenderizasaun to’o remata.

Jornalista: Carmelita Isaac