Santos Limited Sei Maximiza Produsaun Mina iha Bayu Undang

Hatutan.com, (14 Juñu 2022), Díli—Empreza Santos Limited sei halo esforsu hodi maximiza produsaun mina iha Bayu Undang hodi hatama reseita ba Timor Leste (TL).

CEO Santos Limited, Kevin Gallagher ho José Lobato.

CEO Santos Limited, Kevin Gallagher kontente bele mai iha Timor Leste no onra bele hasoru-malu ho Prezidente Repúblika (PR), José Manuel Ramos Horta hodi ko’alia kona-bá asuntu Bayu Undang, liliu kona-bá produsaun ne’ebé maizumenus atu hotu ona iha tinan ida-ne’e no lakleur tán.

Lee Mós: Fundu Mina-rai Billaun $19,1

Kevin Gallagher  esplika mós ba Xefe Estadu kona-bá prosesu sira bainhira produsaun Bayu Undang nian hotu ona saida mak tenke halo maka dezmantelamentu no ida-ne’e atividade ne’ebé sei lori tempu atu hamoos fasilidade sira no ba atividade sira ne’e bele halo iha Timor-Leste hodi lori mós servisu ne’ebé presiza.

“Haree mós ba oportunidade seluk ba investimentu em relasaun ho Bayu Undang nian, se produsaun ita hasai gas ne’e ba liur, agora hosi ita hanoin kona-bá karbon. Ohin loron iha mundu ema hotu preokupa emisaun, entaun hanoin ida ita bele uza Bayu Undang hodi lori Karbon hosi fatin seluk hodi hatama ba iha Bayu Undang ne’ebé bele lori reseita ba Timor Leste no ho ida-ne’e ita bele utiliza nafatin fasilidade sira iha Bayu Undang,” Kevin Gallagher hateten hafoin hasoru-malu ho Prezidente Repúblika iha Palásiu Prezidensiál Nicolao Lobato, Tersa (14/06/2022).

Sertamente prosesu produsaun ne’e atu hotu iha tinan ida-ne’e ka tinan oin, ida ne’e estimasaun sientífiku ne’ebé iha, maibé empreza sei halo esforsu primeiru atu bele maximiza produsaun sei bele dada naruk.

Entaun, atu bainhira loloos seidauk iha serteza no bainhira hatene loloos maka foin halo servisu desmantelasaun ninian, taka mina matan ka gas matan sira ne’e, depois plataforma sira ne’e hamos hosi mina ho substánsia sira ne’ebé la seguru no karik projetu karbon akontese empreza hanoin ona atu utiliza fasilidade sira iha Bayu Undang.

“Bainhira projetu Karbon nia akontese dunik ita sei la dezmantela hotu tanba fasilidade balun iha Bayu Undang ita sei hakarak uza nafatin,”  nia hateten.

CEO empreza Santos Limited ne’e subliña, Xefe Estadu ohin isnteresadu tebes ho aprezentasaun ekipa Santos Limited nian no PR mós husu kona-bá rezerva ne’e nia kle’an hira no husu kona-bá bainhira projetu karbon ne’e avansa ba oin sei bele ajuda mós projetu sira seluk.

Tuir estimasaun, reseita hosi Bayu Undang ba Timor Leste sei bele atinje billaun $21 no ida-ne’e seidauk iha serteza tanba prosesu iha Bayu Undang rasik la’o hela.

Jornalista: Vito Salvadór