TR Seidauk iha Desizaun ba Fiskalizasaun Lei Responsabilidade PR

Hatutan.com, (15 Juñu 2022), Díli—Tribunál Rekursu (TR) seidauk iha plenária atu deside desizaun kona-bá Lei Responsabilidade Prezidente Repúblika (PR) nian.

Prezidente Tribunál Rekursu (PTR), Deolindo dos Santos hasorumalu ho Prezidente Repúblika (PR) José Manuel Ramos-Horta, iha Palásiu Preizdensiál Bairru-Pité, Kuarta (15/06/2022). Foto/Média PR.

“Saida mak ha’u atu ko’alia mak ne’e. Na verdade iha duni pedidu ida hosi Prezidente Repúblika ba Tribunál Rekursu atu halo fiskalizasaun preventiva ba diploma ne’ebé Parlamentu Nasionál rasik aprova kona-bá responsabilidade PR nian. Hau iha esperansa boot katak, antes loron 25 desizaun sai tiha ona no desizaun ne’e sei liu hosi plenáriu ne’ebé juiz sira iha Tribunál Rekursu sei tama iha prosesu ne’e,” Prezidente Tribunál Rekursu (PTR), Deolindo dos Santos hateten iha Palásiu Prezidensiál Nicolau Lobato, Díli, Tersa (15/06/2022).

Lee Mós: Ramos-Horta husu TR Halo Revizaun Preliminár Konstitusionalidade Proposta Lei Responsabilidade PR

Deolindo dos Santos labele divulga konteúdu kona-bá notifikasaun no responsabilidade hosi PN relasiona ho Lei responsabilidade PR.

Iha enkontru ho PR mós PTR la diskute kona-bá buat ne’ebé PR husu ba Tribunál Rekursu atu halo apresiasaun tanba regra la permite, ne’e duni nia la ko’alia ho PR kona-bá ida-ne’e.

Maski nune’e, TR notifika ona Parlamentu Nasionál ne’ebé iha ona resposta hosi Parlamentu rasik no hein TR atu deside, prazu iha loron 25 tuir konstituisaun haruka no prazu ne’e rasik PR la redúz maka nia másimu loron 25.

TR mós simu ona pedidu fiskalizasaun abstrata hosi Bankada CNRT kona-bá orsamentu retifikativu tanba ne’e TR sei hein konkluzaun husi parte hotu-hotu molok deside.

Jornalista: Vito Salvadór