Kampaña no advokasia bá luta hapara tráfiku umanu. Foto/Google
Iha Kinta (16/06/2022), SIKN ezekuta mandadu buska domisiliáriu no apreensaun bá RTF iha nia rezidénsia privadu ida iha Díli laran tanba deskonfia komete kazu tráfiku umanu no violasaun seksuál hasoru minoridade.
Portavós Komandu Jerál PNTL, Superintendente Xefe Armando Monteiro hateten, kazu tráfiku umanu no abuzu seksuál ba minoridade ne’e sai hanesan atensaun no preokupasaun boot hosi ema hotu.
Advertisement
Hosi ida-ne’e, parte família vítima, halo denunsia iha Austrália hafoin Komandu Jerál PNTL, liuhosi Servisu Investigasaun Kriminál Nasionál (SIKN) halo kooperasaun ho Polísia Federal Austrália (PFA), atu identifika no lokaliza suspeitu.
Oras ne’e daudaun, PNTL detein ona autór ne’e iha sela detensaun Komandu Jerál PNTL iha Caicoli, Díli no submete bá investigasaun polisiál.
“Husi investigasaun ida-ne’e, ita sei dezenvolve, deskonfia sei iha tan suspeitu no vítima sira seluk,” Superintendente Xefe Polísia, Armando Monteiro, hateten bá jornalista sira, liuhosi konferénsia imprensa, Sesta (17/06/2022).
Medida sira polisiál ne’e, SIKN ezekuta mandadu hosi TDD kona-bá “mandado busca domiciliária e apreensão”, ho NUC 133/22.PNSIK, hodi halo buska ba autór ne’e iha nia rezidénsia privadu ida iha Díli.