UPM Halo Apreensaun ba Mina-rai Tonelada Sia

Hatutan.com, (21 Juñu 2022), Díli—Polísia Nasionál Timor-Leste (PNTL), liuhosi Unidade Polísia Marítima (UPM), iha semana kotuk, liuhosi atividade operasaun no vizilánsia konsege halo apreensaun ba mina-rai ho tonelada sia (9) ne’ebé mak hatama ilegalmente hosi Timoroan sira ho ró liuhosi tasi.

Segundu Komandante UPM, Inspetór Xefe Polísia Aniceto da Silva.

“Ha’u labele identifika númeru loloos kona-bá peska ilegál, maibé durante semana ida nia laran ami kaptura ema ilegál ne’ebé mak hatama mina hosi rai maran ho tasi. Ami konsege prende kuaze tonelada sia,” Segundu Komandante UPM, Superintendente Xefe Polísia, Aniceto da Silva hateten ba jornalista sira iha kna’ar-fatin, kuartel UMP Largo Lecidere Díli, Tersa (21/06/2022).

Lee Mós: UPM Kontinua Enfrenta Problema Kona-bá Ró Operasaun

Iha prosesu sira durante apreensaun ne’e, membru UPM mós konsege kaptura autór sira tanba envolve direta iha kazu hatama sasán ka mina-rai ilegál hosi Indonézia mai Timor-Leste.

Hosi kazu ne’e, UPM halo kedan investigasaun ba autór sira no rezultadu investigasaun ba kazu ne’e entrega ona ba Ministériu Públiku (MP), nu’udár na’in ba asaun penál, atu bele foti desizaun tuir lei.

“Kontrolu ba atividade kontra bandu sira ne’e ami la’o nafatin durante oras 24 nia laran, kalan loron ami nia misaun mak ida-ne’e. Ami la’o nafatin tuir regras ne’ebé mak iha no kondisaun ró sira ne’e ha’u bele dehan di’ak, hala’o hela operasaun,” Segundu Komandante UPM ne’e informa.

Seidauk Deteta Ema Fa’an Ai-kameli Ilegál

To’o ohin loron, UPM seidauk deteta ema fa’an ai-kameli ilegál ho ró liuhosi tasi. Servisu sira ne’ebé mak hala’o iha área kosteira ka tasi, UPM sempre kontrola no monitoriza durante oras 24. Maski simu duni informasaun kona-bá ema faan ilegál ai-kameli, maibé durante ne’e seidauk detekta.

“Ami hetan informasaun duni, maibe halo viziliánsia maka’as. Entaun la konsege liuhosi área kosteira. Maibé ami seidauk halo apreensaun kona-bá ida ne’ebé mak atu hasai ai-kameli ilegál hosi tasi. Ami kuandu iha ona informasaun ami halo vizilánsia maka’as, sira sei la konsege hasai hosi tasi. Maibé, karik iha fatin seluk, ida ne’e ha’u labele hatene,” Aniceto da Silva hateten.

Jornalista: Rogério Pereira Cárceres