Defeza & Seguransa
UPM Kontinua Enfrenta Problema Kona-bá Ró Operasaun
Hatutan.com, (21 Juñu 2022), Díli—Polísia Nasionál Timor-Leste (PNTL), liuhosi Unidade Polísia Marítima (UPM), durante ne’e sempre enfrenta difikuldade kona-bá Ró Operasaun nian ne’ebé balun kondisaun aat ona no seidauk hadi’a to’o agora.
Segundu Komandante UPM, Inspetór Xefe Polísia Aniceto da Silva.
Ró hirak-ne’e mós seidauk sufisiente, maibé UPM prontu atu servisu nafatin hodi kontrola no asegura rikusoin sira Timor nian iha tasi-laran.
Lee Mós: UPM Detein Sidadaun Indonézia Ida Peska Ilegál iha Palaka
“UPM ninia atividade lorloron la’o, mantein nafatin vizilánsia no seguransa iha kosteira la’o normál hela. Maski ami iha difikuldade kona-bá transporte maibe ne’e la hamate ami nia espíritu nasionalizmu no ba servisu unidade ninian, ami la’o nafatin,” Segundu Komandante UPM, Inspetór Xefe Polísia, Aniceto da Silva hateten ba jornalista sira iha kna’ar fatin Kuartél UPM, Largo Lecidere, Dili, Tersa (21/06/202).
Kona-bá kondisaun Ró NRTL ne’ebé mak antes ne’e avaria, parte lideransa másimu UPM nian aprezenta ona ba instituisaun PNTL liuhosi ierarkia Komandu nune’e bele fó solusaun.
“Ami nia Ró Kay Rala di’ak hela, maski iha item ida-rua ne’ebé mak la di’ak, maibé ami buka maneira seluk konsege rezolve. Ami iha parseiru, ami iha dalan atu hadi’a no agora kondisaun ró ne’e di’ak hela. Ami utiliza hela iha patrulla. Ami nian ró ki’ik sira di’ak hela,” Aniceto da Silva hateten.
Ró UPM iha Lecidere.
Hatán kona-bá ró sira ne’ebé durante avaria, ninia prosesu manutensaun hala’o hela no bainhira identifika ekipamentu ruma mak grave UPM rekomenda de’it ba instituisaun PNTL, nune’e bele buka solusaun.
Durante ne’e UPM la’ós halo de’it operasaun iha Kosta Norte no Leste, maibé mós iha parte Súl ka tasi-mane, tanba membru sira ne’ebé mak destakadu iha Kosta Súl mantein nafatin monitoriza no observa área tasi-mane.
“Fasilidade kona-bá ró sira, ha’u hanoin, ita sei halo planu ida atu aprezenta ba governu hodi bele haree situasaun ida-ne’e,” Aniceto da Silva hateten.
Segundu Komandante UPM ne’e lakohi temi númeru ka kuantidade ró ne’ebé mak durante ne’e sira utiliza hodi halo operasaun iha tasi-laran, inklui totál membru iha UPM, tanba konsidera hanesan segredu ida instituisaun nian, nune’e labele fó-sai ba públiku.
Jornalista: Rogério Pereira Cárceres