Formandu Na’in-114 Konklui Formasaun Lian Inglés iha HNGV

Hatutan.com, (23 Juñu 2022), Díli-Formandu hamutuk ema na’in-114, Kinta ( 23/06/2022), konklui ona sira-nia formasaun lian Inglés kona-bá saúde no médika profisionál, ne’ebé oferese hosi Fundasaun ASSA (prevene no kura rekursu umanu iha Timor-Leste) ho Ministériu Saúde liuhusi Ospitál Nasionál Guido Valadares (HNGV).

Partisipante nu’udár mós graduante sira ne’ebé durante ne’e partisipa formasaun lian Ingles iha HNGV. Foto/Hatutan.com

Diretór ezekutivu ba Fundasaun ASSA, Bendito Soares hateten, formasaun ida-ne’e nu’udár timoroan, tenke orgullu no tenke investe di’ak liután formasaun sira iha rai-laran, atu nune’e, timoroan mós bele oinsá mak halo mudansa bá rekursu umanu iha Timor-Leste.

“Formasaun ne’e foku bá English for a health a medical professional. Iha segundu graduasaun ninian, ami fó bá staff HNGV ne’e, nivel inglés jerál. Ida ne’e, ami foka ba Inglés bázika no pre-intermediáriu, tanba ami haree Inglés ita fó liu profisionál, ita mós tenke haree ninia kapasidade formandu sira ne’e. Entaun ita labele fó liu kapasidade aas  duke nia nivel seidauk to’o bá iha profisionál. Entaun, mais ami nia intensaun, etapa bá etapa, to’o sira ba iha profisionál saúde nian,” Diretór ezekutivu ba Fundasaun ASSA, Bendito Soares hateten bá jornalista sira, hafoin serimónia entrega sertifikadu bá formandu sira iha Salaun enkontru HNGV, Bidau, Díli.

Formasaun ne’e akontese tanba iha kooperasaun servisu ida, liuhosi akordu formál entre Fundasaun ASSA ho Ministériu saúde (MS) liuhosi HNGV.

Alvu hosi kooperasaun servisu ida ne’e, parte Fundasaun ASSA sei fasilita no apoia formasaun bá staff sira HNGV nian mak hanesan médiku, enfermeira no enfermeiru timoroan sira iha lingua ingles, ne’ebé mak foka kona-bá área saúde nian, hodi halo atendimentu ba públiku sira, liu-liu sidadaun estranjeiru sira, bainhira moras, ba halo tratamentu saúde iha HNGV.

Formasaun iha faze dahuluk no daruak nian, staff HNGV nian hamutuk ema na’in-50 resin mak benefisia ona formasaun hosi ASSA,no konklui ona mós sira ninia kursu.

Maske nune’e, formasaun ne’e, fó oportunidade ba estudante saúde sira hosi universidade oioin iha TL atu aprende. Estudante saúde sira ne’e, mai hosi Universidade Nasionál Timor-Lorosa’e (UNTL), Universidade Dili (UNDIL), Universidade Orientál Timor-Lorosa’e (UNITAL), Instituto de Ciências da Saúde (ICS), inklui seluk tán.

Fundasaun ASSA rejistadu iha Ministériu Justisa (MJ), no hetan legalidade hodi hala’o ninia atividade iha rai-laran. Oras ne’e sira prosesa hela bá legalizasaun sentru treinamentu no durante ne’e, sempre hetan akompañamentu hosi Sekretária Estadu Formasaun Profisionál no Empregu (SEFOPE), oinsá haree kona-bá destinu Fundasaun ASSA nian ba futuru.

Reprezentante diretór HNGV, Raúl Humberto Gama, dehan, ezisténsia Fundasaun iha HNGV, durante tinan rua resin ona, molok sira konsellu foun Ospitál nian tama, hodi substitui estrutura ka konsellu anterior.

“Sira fó formasaun  kursu lingua Inglés nian. Tanba ne’e maka agora daudaun ne’e, ami hosi konsellu foun ida ne’e, ami hanoin oinsá para atu bele halo memorandum of understanding ida, ne’ebé mak ohin simbolikamente entrega ona ba Fundasaun ASSA, depois ita implementa tuir memorandum ne’ebé mak ita asina,” reprezentante diretór HNGV,” Raúl Humberto Gama haktuir.

Iha fatin hanesan, Komisáriu Komisaun Funsaun Públika (CFP-Sigla Portugés) bá Asuntu Forsa Traballu no Formasaun, António Freitas, husu bá konsellu HNGV ho Fundasaun ASSA nian, atu aprezenta no reúne fila-fali ho Komisáriu sira iha KFP, Fundo Dezenvolvimentu Kapitál Umanu (FDCH), ho Autoridade Nasionál ba Administrasaun Públika (INAP), hodi haree kona-bá konteúdu no substánsia akordu ne’ebé mak parte rua selebra.

KFP fó alerta bá instituisaun privádu sira ne’ebé mak oferese kursu ba iha funsionáriu públiku sira, nú-mínimu nia tenke rejistu iha MJ, iha notariadu, depois tenke hetan duni sertifikadu, nia área espesialista ba kursu nian ne’e oinsá, hafoin mak KFP, FDHC ho INAP, bele deside atu apoiu ba prosesu formasaun sira ne’e.

“Sé enkuantu, institutu privadu sira ne’ebé mak oferese kursu bá funsionáriu públiku sira, espesialmente hanesan ASSA, bá profisionál saúde sira iha HNGV, nia tenke mai ho substánsia matéria relativamente ba kursu profisionál saúde. Sé mai ho kursu Inglés ida báziku de’it, entaun ne’e, entre INAP ho KFP ho FDCH, ami sei haree fila-fali, tuur hamutuk fila-fali ho HNGV,” António Freitas afirma.

Jornalista: Rogério Pereira Cárceres